Цените на нафтата денеска благо се намалија по седумдневниот раст, додека инвеститорите ја анализираат одлуката на Обединетите Арапски Емирати да ја напуштат ОПЕК, како и продолжените ризици за глобалното снабдување.
Суровата нафта Брент за испорака во јуни се намали за 1 цент и се тргуваше по 111,25 долари за барел. Поактивниот јулски договор падна за 28 центи на 104,12 долари за барел.
Според аналитичарите, излегувањето на ОАЕ од ОПЕК може да донесе поголемо производство во иднина, но ефектите нема да се почувствуваат веднаш поради блокадата на Ормускиот Теснец.
Дополнителна неизвесност создава и ситуацијата со Иран, откако американските медиуми објавија дека САД подготвуваат продолжување на блокадата на иранските пристаништа.
Ормускиот Теснец е еден од најважните светски енергетски коридори, преку кој минуваат околу 20% од глобалните испораки на нафта и течен природен гас.
Поддршка на цените дава и падот на американските резерви на сурова нафта, кои според пазарни извори се намалуваат втора недела по ред.
Извор: Ројтерс
