Битола и Елбасан, Албанија, ќе бидат меѓу првите општини во Енергетската заедница кои ќе работат на воспоставување области за забрзан развој на обновливите извори на енергија, со поддршка од Секретаријатот на Енергетската заедница.
За таа цел, Секретаријатот потпиша меморандуми за соработка со двете општини, со кои е предвидена техничка поддршка за декарбонизација, планирање и поедноставување на постапките за одобрување на проекти од обновливи извори.
Битола е избрана како пилот-проект поради својата улога во македонскиот енергетски сектор и фактот што се наоѓа во центарот на најзначајниот јагленокопен регион во земјата. Елбасан, пак, е историски индустриски центар на Албанија и регион со традиционална зависност од јаглерод-интензивната индустрија.
Поддршката ќе се реализира преку Центарот за забрзување на обновливите извори на Секретаријатот на Енергетската заедница, кој обезбедува техничка помош за земјите од Западен Балкан во реформата на процедурите за издавање дозволи и планирање на проекти од обновливи извори.
Во рамки на соработката, Битола и Елбасан ќе добијат поддршка за идентификување и развој на таканаречени „области за забрзување на обновливите извори“. Станува збор за подрачја во кои проектите за обновлива енергија би можеле побрзо да се планираат и одобруваат, со истовремено почитување на мерките за заштита на биодиверзитетот.
Овој инструмент е предвиден во најновата верзија на Директивата на Европската Унија за обновливи извори на енергија (RED III). Министерскиот совет на Енергетската заедница препорача договорните страни да започнат со определување и спроведување на вакви области пред целосното внесување на директивата во правната рамка на Енергетската заедница.
Според Секретаријатот, пилот-проектите во Битола и Елбасан треба да послужат како пример што во иднина би можеле да го применат и други региони и општини во Западен Балкан зависни од фосилни горива.
Од Секретаријатот посочуваат дека воспоставувањето на вакви области може да придонесе и за привлекување инвестиции во обновливи извори и индустрии поврзани со чистата енергија, преку создавање попредвидливи услови за инвеститорите и забрзување на реализацијата на проектите.
За земјите од регионот, развојот на обновливите извори и забрзувањето на процедурите се дел од обврските поврзани со усогласувањето со европското енергетско и климатско законодавство и со идната интеграција во внатрешниот енергетски пазар на ЕУ.
Извор: Energy-community.org
