Европа направила „голема грешка“ што по енергетската криза во 2022 година не ја намалила побрзо зависноста од увезени фосилни горива преку забрзана електрификација, изјави извршниот директор на Меѓународната агенција за енергија (ИЕА), Фатих Бирол, во заедничко интервју со еврокомесарот за енергетика Дан Јоргенсен за „Фајненшл тајмс“.
Според Бирол, уделот на електричната енергија во финалната потрошувачка во Европската Унија изнесува околу 23%, што ја ограничува конкурентноста и енергетскиот суверенитет на Унијата, која и натаму во голема мера зависи од увоз на нафта и природен гас.
Тој оцени дека ЕУ треба да го следи примерот на Кина, Јапонија и Јужна Кореја, каде што стапката на електрификација надминува 30%. Унијата има цел до 2030 година уделот на електричната енергија во вкупната потрошувачка да достигне 32%.
Во истото интервју, еврокомесарот Јоргенсен изјави дека стапката на електрификација во ЕУ практично стагнира во последната деценија и дека е неопходно значително побрзо воведување на електричната енергија во секторите греење, транспорт и индустрија.
Тој најави дека Европската комисија следната недела ќе претстави акциски план за електрификација, кој ќе содржи мерки за намалување на даночниот товар врз електричната енергија и финансиски поттикнувања за набавка на топлински пумпи, електрични автомобили и други технологии со ниски емисии на јаглерод.
Според нацрт-документ во кој увид имал „Фајненшл тајмс“, Комисијата ќе предложи до 2030 година цената на електричната енергија за домаќинствата да не биде повеќе од 2,5 пати повисока од цената на природниот гас, а за индустријата не повеќе од двојно повисока. За таа цел ќе се препорача намалување на даноците и другите давачки за електричната енергија.
Бирол предупреди и дека развојот на електропреносната мрежа не го следи растот на обновливите извори на енергија. Иако во Европа минатата година биле инсталирани рекордни 85 гигавати нови обновливи капацитети, околу 600 гигавати проекти сè уште чекаат приклучување на електроенергетската мрежа.
Јоргенсен оцени дека земјите-членки можат значително да ја забрзаат енергетската транзиција преку побрзо проширување и модернизација на електроенергетската инфраструктура, што ќе овозможи поефикасно интегрирање на обновливите извори на енергија.
Извор: Financial Times
