Босна и Херцеговина и Хрватска во текот на вчерашниот ден во Дубровник потпишаа меѓудржавен договор за изградба на Јужната гасна интерконекција, стратешки енергетски проект што треба да ја поврзе БиХ со хрватскиот гасен систем и ЛНГ терминалот на островот Крк.
Договорот беше потпишан во рамки на иницијативата „Три мориња“, а на церемонијата присуствуваше и американскиот министер за енергетика Крис Рајт, што дополнително ја нагласи поддршката на САД за реализација на проектот.
Според Советот на министри на БиХ, изградбата на гасоводот ќе обезбеди сигурно и стабилно снабдување со природен гас, како и диверзификација на правците и изворите на енергенси. Целта е намалување на зависноста на БиХ од рускиот гас, кој моментално пристигнува преку гасоводот „Турски тек“ и Србија.
Трасата на гасоводот е планирана на правецот Сплит – Загвозд – Посушје – Томиславград – Купрес – Бугојно – Нови Травник/Травник, со дополнителни краци кон Мостар, Ливно, Јајце, Чапљина, Тузла и други градови.
Хрватскиот премиер Андреј Пленковиќ изјави дека проектот „сигурно ќе се реализира“ доколку босанско-херцеговската страна ги исполни сите преземени обврски.
Тој нагласи дека Хрватска инсистирала договорот да биде потпишан токму на самитот во Дубровник за да добие поголема видливост и политичка тежина.
„Јужната интерконекција е стратешко поврзување на БиХ со Хрватска во енергетска смисла“, рече Пленковиќ, додавајќи дека проектот тешко би бил реализиран без вклучување на американски инвеститори.
Како носител на проектот е избрана американската компанија AAFS Infrastructure and Energy, чие вклучување беше овозможено со измени на законската рамка усвоени во парламентот на Федерацијата БиХ.
Изградбата на гасоводот треба да заврши до 2028 година, а во рок од седум години по неговото пуштање во употреба е предвидена и изградба на гасна електрана.
Договорот сега треба да биде ратификуван во двата дома на Парламентарното собрание на БиХ, како и од Владата на Хрватска.
Енергетика 24
