Четиринаесет големи енергетски компании и организации од девет земји во Балтичкиот регион формираа нова Baltic Energy Initiative, со цел заеднички развој на прекугранични енергетски проекти, поголема отпорност на инфраструктурата и координиран настап пред институциите на Европската Унија.
Во иницијативата учествуваат компании и организации од Полска, Финска, Шведска, Данска, Германија, Литванија, Латвија, Естонија и Норвешка. Меѓу потписниците се Latvenergo, Eesti Energia, Enefit, Fortum, ORLEN, KN Energies, DNV Energy Systems, Topsoe, Siemens Energy, Adven, Steady Energy, P2X Solutions, Gasgrid Finland и Vestas.
Новата платформа ќе овозможи здружување на техничкото знаење и заедничко аплицирање за средства од ЕУ за проекти од регионално значење. Меѓу приоритетите се развојот на офшор ветерни електрани, интеграција на пазарите за течен природен гас и био-ЛНГ, создавање регионален пазар на водород, транспорт и складирање на јаглерод, како и развој на мали модуларни нуклеарни реактори.
Особено место во иницијативата има заштитата на критичната енергетска инфраструктура. Компаниите планираат да разменуваат искуства за заштита на мрежите, сајбер-безбедност, подготвеност за вонредни ситуации и одговор на физички и хибридни закани.
Алијансата ќе настапува и со заеднички позиции пред институциите на ЕУ, со цел да влијае врз регулативата и да обезбеди механизми за финансирање на критични енергетски проекти во регионот.
Иницијативата доаѓа во период кога балтичките земји го засилуваат регионалното поврзување и отпорноста на електроенергетските мрежи, особено по зголемените безбедносни ризици за критичната инфраструктура во Северна и Источна Европа.
„Сите земји околу Балтичкото Море се пообединети од кога било, поврзани со заеднички безбедносни и економски предизвици за изградба на безбедна, просперитетна и обединета иднина“, изјави извршниот директор на Latvenergo, Мартинш Чаксте.
Тој оцени дека енергијата е темел на заедничката корист и дека меѓународната соработка отвора простор за развој на нови компетенции и бизнис-сектори, особено во ветерната енергија, дата-центрите и водородот.
Формирањето на алијансата претставува уште еден чекор кон поголема регионална координација на енергетските инвестиции, во услови кога Балтичкиот регион истовремено ја забрзува декарбонизацијата, ја зголемува електрификацијата и ја зајакнува енергетската безбедност.
Извор: CEEnergynews.com
