Со уривањето на две масивни разладни кули, Германија и симболично стави крај на една ера во својата енергетика. Во термоелектраната Гелзенкирхен-Шолвен, во покраината Северна Рајна-Вестфалија, минатиот викенд со контролирани експлозии беа срушени кулите високи по 114 метри, отворајќи простор за нова генерација енергетски капацитети.
На локацијата на некогаш најголемата германска термоелектрана се планира изградба на модерна гасна електрана со комбиниран циклус, која во иднина ќе може да користи и водород како гориво. Паралелно, во план е и постројка за производство на водород од амонијак, што ќе се увезува во Германија по морски пат. Проектот е дел од пошироките напори на земјата за забрзана енергетска транзиција и намалување на зависноста од јаглен.
Електраната, која е во сопственост на компанијата Uniper, со децении претставуваше столб на германската индустриска енергетика. Во својот врв, комплексот располагаше со пет блока на јаглен и два на нафта, со вкупен инсталиран капацитет од 3.400 мегавати.
Сепак, од 2014 година во работа останаа само два јаглени блока со капацитет од 830 мегавати. И покрај постепеното гаснење, германскиот оператор на електропреносниот систем Amprion ги оцени овие капацитети како важни за стабилноста на мрежата, поради што електраната ќе остане дел од стратешките резерви најмалку до 2031 година.
Трансформацијата на Гелзенкирхен-Шолвен претставува уште еден показател за промените низ кои минува германската енергетика — од јаглен кон почисти и поодржливи извори на енергија.
Извор: Uniper.energy
