Албанија, Грција и Соединетите Американски Држави потпишаа 20-годишен енергетски договор вреден шест милијарди евра, со кој е предвидено снабдување на Албанија со американски течен природен гас (ЛНГ) и развој на регионална енергетска инфраструктура.
Договорот беше склучен меѓу албанската државна компанија АЛБГАЗ и компанијата АКТОР ЛНГ УСА, подружница на грчката групација АКТОР. Според договореното, од 2030 година Албанија ќе добива по една милијарда кубни метри природен гас годишно.
Церемонијата на потпишување се одржа во кабинетот на премиерот во Тирана, во присуство на албанскиот премиер Еди Рама, министерката за инфраструктура и енергетика Енеа Каракачи и американската амбасадорка во Грција, Кимберли Гилфојл.
Паралелно беше потпишан и меморандум за разбирање за развој на енергетскиот центар во Валона, проект што предвидува изградба на интегриран енергетски хаб, вклучително и гасна електрана со капацитет од околу 380 мегавати.
Албанската влада соопшти дека договорите претставуваат важен чекор кон диверзификација на енергетските извори и јакнење на енергетската независност на земјата, во тесна соработка со САД и преку конкретна регионална соработка со соседна Грција.
Министерката Каракачи изјави дека партнерството со САД ја одразува заедничката визија за безбедна и одржлива енергетска иднина, заснована врз отпорност и долгорочно планирање.
„Развојот на енергетскиот центар во Валона е централен столб на оваа визија и повеќекомпонентен проект што ќе ја редефинира улогата на Албанија на енергетската мапа“, изјави таа.
Американската амбасадорка Кимберли Гилфојл оцени дека Албанија добива сè поважна улога како поврзувачки фактор на Западен Балкан.
Премиерот Еди Рама истакна дека силата на партнерството меѓу Албанија и САД лежи во неговиот сеопфатен карактер, кој комбинира долгорочна сигурност во снабдувањето, развој на клучна инфраструктура, експертиза од приватниот сектор и заедничка геополитичка посветеност на енергетска отпорност.
Извор: EuropeanWesternBalkans.org
