European Investment Bank (ЕИБ) Групацијата најави нов пакет финансирање вреден над 2,4 милијарди евра, наменет за зајакнување на енергетската отпорност и развој на напредни технологии во Европа. Средствата беа потврдени минатата недела за време на индустрискиот саем Hannover Messe во Германија, како дел од европскиот одговор на растечките геополитички тензии и енергетските предизвици.
Финансирањето, поддржано од програмата InvestEU, опфаќа пет клучни операции насочени кон енергетска безбедност, трансфер на технологии и индустриски иновации. Проектите се реализираат во соработка со компании и фондови како Commerzbank, akf bank, Turbine Capital, Atlantic Bridge и Obloo.
Потпретседателката на ЕИБ, Никола Бир, изјави дека инвестициите ќе помогнат Европа да ја претвори кризата во можност, преку финансирање на клучни сектори како што се енергетската инфраструктура, роботиката, вештачката интелигенција и вселенските технологии. Таа нагласи дека во услови на глобална неизвесност, вложувањето во иновации претставува основа за економска безбедност.
Дополнително, извршниот потпретседател на Европската комисија, Стефан Сежурн, посочи дека европската конкурентност зависи од способноста за развој на сопствени технологии и производство на чиста енергија. Според него, новите инвестиции ќе придонесат за намалување на енергетските ризици и задржување на висококвалификувани работни места во Европа.
Клучен дел од пакетот е договорот со Commerzbank, кој ќе овозможи до 2 милијарди евра инвестиции во електрични мрежи низ Германија и ЕУ, со цел модернизација и дигитализација на енергетските системи. Воедно, преку Европскиот инвестициски фонд се поддржуваат мали и средни претпријатија за воведување роботика и решенија базирани на вештачка интелигенција.
Дел од средствата се насочени и кон таканаречени „deep tech“ компании, особено оние кои произлегуваат од европските универзитети и истражувачки центри, со фокус на сектори како полупроводници, сајбер-безбедност, квантни технологии и климатски иновации.
Со овој пакет, ЕИБ Групацијата има за цел да мобилизира дополнителни инвестиции, да ја зајакне енергетската сигурност и да ја позиционира Европа како лидер во клучните технолошки области во услови на засилена глобална конкуренција.
Извор: EIB.org
