Советот на Европската Унија во текот на вчерашниот ден усвои заклучоци за енергетската и климатската дипломатија, со кои чистата енергија, економската конкурентност и безбедноста се поставуваат како клучни приоритети на Унијата во наредниот период.
Во документот се оценува дека светот се соочува со растечка геополитичка нестабилност, нарушени синџири на снабдување и засилени климатски ризици, што директно влијае врз суверенитетот и економската сигурност на Европската Унија. Поради тоа, Советот нагласува дека забрзувањето на зелената транзиција е најдобриот пат за намалување на зависноста од увезени фосилни горива и зајакнување на европската стратешка автономија.
Според заклучоците, инвестициите во сончева и ветерна енергија, складирање електрична енергија, енергетска ефикасност и нискојаглеродни технологии ќе придонесат за посигурно снабдување, постабилни цени и поголема отпорност на европската економија.
Советот повикува и на диверзификација на снабдувањето со енергенси, нуклеарно гориво и критични суровини, како и на јакнење на енергетската инфраструктура и прекуграничните врски. Воедно, се истакнува потребата од подобра заштита на критичната инфраструктура од сајбер напади, хибридни закани и последици од климатските промени.
Во заклучоците повторно се осудува руската агресија врз Украина и нападите врз нејзината енергетска инфраструктура. Европската Унија најавува продолжување на поддршката за обновата на украинскиот енергетски сектор, со фокус на модерни, чисти и децентрализирани технологии.
Посебно внимание е посветено и на Западен Балкан. Советот повикува на засилена соработка со земјите од регионот во делот на енергетската безбедност, реформите на пазарите, усогласувањето со климатските стандарди и постепената интеграција во европскиот енергетски систем.
Советот повикува на засилена соработка со земјите од Западен Балкан во областа на енергетската безбедност, реформите на енергетските пазари и усогласувањето со климатските и еколошките стандарди на Европската Унија. Целта е постепена интеграција на регионот во европскиот енергетски систем, во согласност со процесот на проширување и приближување кон ЕУ.
се вели во Заклучоците
Истовремено, документот нагласува дека зелената транзиција треба да стане и индустриска можност за Европа. Затоа европската дипломатија ќе има задача да ги промовира европските зелени технологии, производи и стандарди на светските пазари. Воедно, се наведува дека новите технологии можат да ја зајакнат и одбранбената подготвеност и отпорноста на европските армии.
Советот ја потврдува и цврстата поддршка за Парискиот договор и целта глобалното затоплување да се задржи до 1,5 степени Целзиусови. ЕУ останува посветена на климатска неутралност до 2050 година, како и на намалување на емисиите на штетни гасови во следните децении.
Како најголем светски јавен донатор за климатско финансирање, Унијата најавува продолжување на поддршката за ранливите држави преку инвестиции во адаптација, зелена инфраструктура и отпорност на климатски катастрофи.
Во заклучоците се предупредува и дека климатските промени веќе претставуваат безбедносен ризик, бидејќи предизвикуваат миграции, недостиг на вода и храна, нестабилност и нови конфликти. Поради тоа, ЕУ ќе ги интегрира климатските и еколошките прашања во надворешната, безбедносната и одбранбената политика.
Со усвојувањето на овие заклучоци, Советот на ЕУ испраќа порака дека енергетската независност, зелената индустрија и безбедноста повеќе не се одделни политики, туку заеднички столбови на иднината на Европа.
Извор: Consilium.europa.eu
