Австриската нафтена и гасна компанија ОМВ ја предложи Ема Дилејни за нов извршен директор и претседател на Управниот одбор, со мандат од септември годинава, соопшти компанијата.
Дилејни, која е државјанка на Ирска, доаѓа од британската енергетска компанија БП, каде има повеќе од 30 години професионално искуство и е дел од највисокото раководство.
Во моментов таа ја извршува функцијата извршен потпретседател во една од трите глобални деловни единици на БП, каде раководи со организација од над 50.000 вработени во околу 50 земји. Нејзината надлежност опфаќа горива и биогорива, индустриски и автомобилски лубриканти, авионски горива и електромобилност.
Доколку биде потврдена, Дилејни ќе стане првата жена на чело на ОМВ.
Австрискиот канцелар Кристијан Штокер и министерот за финансии Волфганг Хатмансдорфер оценија дека ОМВ е компанија од стратешко значење за австриската економија и индустрија.
„Нашата цел е понатамошен развој и стратешко зајакнување на ОМВ како една од водечките енергетски компании во Европа. Именувањето на Ема Дилејни испраќа силен сигнал во таа насока“, се наведува во нивната заедничка изјава.
Хатмансдорфер додаде дека фокусот на компанијата ќе биде насочен кон домашна експлоатација на суровини, натамошна диверзификација, како и развој на хемискиот и пластичниот сектор.
Надзорниот одбор на ОМВ, со седиште во Виена, ќе одлучува за назначувањето на следната седница. Доколку биде избрана, мандатот ќе трае три години, со можност за продолжување за уште две години.
Сегашниот извршен директор Алфред Штерн, кој ја води компанијата од септември 2021 година, минатата година најави дека нема повторно да се кандидира по истекот на неговиот договор на крајот на август 2026 година.
По објавата, БП соопшти дека Ричард Хардинг привремено ќе ја преземе функцијата раководител на секторот за клиенти и производи, на местото на Дилејни.
ОМВ има значајно присуство и на Балканот, особено преку својата подружница ОМВ Петром во Романија, која важи за најголема интегрирана енергетска компанија во Југоисточна Европа. Групацијата управува со стотици бензински станици во Романија, Бугарија, Србија и Молдавија, а инвестира и во истражување на нафта и гас во Црното Море, обновливи извори на енергија и инфраструктура за електрични возила.
Извор: Omv.com
