Велика Британија ќе стане првата европска земја што ќе воведе задолжително користење на соларни панели и нискојаглеродно греење во сите новоизградени домови, во обид да ја зајакне енергетската независност и да ги намали трошоците за домаќинствата.
Според новите правила, дел од стратегијата Future Homes Standard, сите нови објекти изградени од 2028 година ќе мора да имаат соларни панели на покривите и нема да смеат да бидат приклучени на гасоводната мрежа. Наместо тоа, ќе користат топлински пумпи или алтернативни системи за греење.
Мерките доаѓаат во услови на зголемена геополитичка нестабилност, вклучително и војната со Иран, што дополнително ја забрзува транзицијата кон чиста енергија. Британскиот министер за енергетика Ед Милибанд изјави дека ваквите кризи ја нагласуваат потребата од намалување на зависноста од фосилни горива.
Владата проценува дека новите стандарди ќе ги намалат сметките за енергија за домаќинствата за неколку стотици фунти годишно, додека емисиите на јаглерод ќе се намалат за околу 75% во споредба со досегашните правила.
Дополнително, се најавува и воведување на т.н. „plug-in“ соларни панели, кои ќе можат да се инсталираат без стручна помош и наскоро ќе бидат достапни во продажба низ земјата.
Министерот за домување Стив Рид изјави дека новите правила ќе обезбедат домовите да бидат „поевтини за одржување и потопли за живеење“. Од енергетскиот сектор, директорот на Octopus Energy, Грег Џексон, оцени дека интересот за вакви технологии значително пораснал, нагласувајќи дека секој соларен панел и топлинска пумпа придонесуваат за пониски сметки и поголема енергетска независност.
Сепак, дел од градежните компании изразуваат загриженост дека новите барања може да ја зголемат цената на изградбата за околу 10.000 фунти по дом.
И покрај тоа, владата оценува дека станува збор за клучен чекор во трансформацијата на домувањето, со кој обновливите извори на енергија и нискоемисионите системи стануваат стандард во идната градба.
Извор: BBC.com
