Брисел, 24 март 2026 — Европската Унија нема да се откаже од забраната за увоз на руски фосилни горива, ниту ќе го забави преминот кон обновливи извори на енергија, и покрај растот на цените предизвикан од војната во Иран, изјави европскиот комесар за енергија Дан Јоргенсен.
Говорејќи на панел во рамки на самитот „Конкурентна Европа“, Јоргенсен истакна дека „нема враќање на зависноста од руска енергија“ и додаде дека Европа „никогаш повеќе не треба да увезе ниту една молекула“ руски гас.
Тој оцени дека Европската Унија предолго индиректно ја финансирала руската војна во Украина преку набавка на енергенси, обвинувајќи ја Москва дека ја користела енергијата како средство за притисок врз земјите членки.
Изјавите доаѓаат во време кога дел од европските лидери повикуваат на преиспитување на односите со Русија, што би можело да го загрози спроведувањето на планот за постепено укинување на увозот на руски гас. Европската комисија се очекува подоцна годинава да предложи слична забрана и за увоз на нафта.
Меѓу најгласните поборници за обновување на трговијата со Русија се унгарскиот премиер Виктор Орбан, кој бара суспензија на санкциите, како и белгискиот премиер Барт де Вевер, кој смета дека ЕУ треба да преговара за повторен пристап до поевтина енергија.
Сепак, Јоргенсен нагласи дека Унијата денес е во многу посилна позиција отколку за време на енергетската криза во 2022 година, кога Русија обезбедувала околу 45% од гасот во ЕУ. Во меѓувреме, зависноста е намалена на околу 10%.
„Бевме многу ранливи и не сакаме повторно да се најдеме во таква ситуација“, рече тој.
И покрај политичките притисоци и потребата од краткорочна поддршка за домаќинствата и индустријата, Јоргенсен истакна дека поддршката за обновливите извори останува силна.
„Во Европа нема вистинска дебата дали ни треба повеќе обновлива енергија и дали треба да ја намалиме зависноста“, додаде комесарот.
Извор: Politico.eu
