Глобалните цени на нафтата остануваат на високо ниво и покрај намалувањето во петокот, додека геополитичките тензии на Блискиот Исток и нарушувањата во снабдувањето продолжуваат да вршат силен притисок врз енергетските пазари.
Според најновите податоци, суровата нафта тип „Брент“, која се смета за глобален репер, се тргуваше по цена од 108,5 долари за барел, откако во текот на денот во петокот, достигна и 110 долари. Американската нафта „WTI“ остана речиси непроменета на ниво од 95,6 долари за барел.
Аналитичарите од инвестициската банка Голдман Сакс предупредуваат дека постои реален ризик цените да останат над 100 долари подолг временски период, дури и до 2027 година, особено доколку продолжат прекините во снабдувањето и геополитичките конфликти.
Главен фактор за нестабилноста останува затворањето на Ормускиот теснец, клучен поморски коридор низ кој поминува околу 20% од светското снабдување со нафта. Теснецот е практично блокиран веќе 22 дена поради ескалацијата на конфликтот меѓу Иран и Израел.
Тензиите дополнително се зголемија откако израелските напади врз ирански енергетски капацитети предизвикаа одмазднички удари врз гасната инфраструктура во Катар, вклучително и комплексот Рас Лафан, најголем светски центар за течен природен гас. Нападите веќе го намалија извозниот капацитет на Катар за 17%, а целосната обнова може да трае и до пет години.
Во меѓувреме, САД се обидуваат да го ублажат ударот врз домашниот пазар. Администрацијата на Доналд Трамп работи на зголемување на домашното производство, а се разгледуваат и дополнителни мерки, вклучително и ослободување на стратешки резерви на нафта.
Цените на горивата во САД веќе бележат раст и достигнаа просек од 3,91 долари за галон, што е највисоко ниво во последните две и пол години.
И покрај одредени дипломатски сигнали за деескалација, експертите предупредуваат дека конфликтот не покажува знаци на брзо решавање. Според проценките, доколку нарушувањата во снабдувањето продолжат, цената на „Брент“ може да го надмине историскиот максимум од 147 долари за барел, забележан во 2008 година.
Во поповолно сценарио, постепено обновување на транспортот преку Ормускиот теснец би можело да доведе до стабилизација на цените на нафтата во текот на 2026 година. Сепак, неизвесноста останува висока, а енергетските пазари и натаму се под силно влијание на геополитичките ризици.
Извор: CNN.com
