АД МЕПСО поднесе апликација за добивање статус PECI (Проект од интерес за Енергетската заедница) за проектот „400 kV интерконекциски коридор Исток – Запад, Западна секција“, кој е оценет како инфраструктурен зафат со значајно регионално и стратешко значење.
Проектот предвидува изградба на нов 400 kV далекувод од Тетово до Призрен, со што ќе се воспостави нова директна електроенергетска врска меѓу Северна Македонија и електроенергетскиот систем на Косово. Коридорот Скопје – Тетово – Охрид, со прекугранична врска кон Призрен, треба значително да ја зајакне преносната мрежа во западниот дел на земјата. Вкупната должина на западната секција е околу 255 километри.
Клучен дел од проектот е изградбата на нова трансформаторска станица 400/110 kV во Тетово, како и можност за изградба на дополнителна трансформаторска станица 400/110 kV во Осломеј. Со тоа ќе се овозможи подобра интеграција на постојните и планираните производствени капацитети, вклучително и обновливите извори на енергија, како и поголема оперативна флексибилност на системот.
Проектот има изразена регионална димензија и се надоврзува на веќе одобрениот PECI проект за надградба на електроенергетскиот коридор Косово – Албанија, на делницата Призрен – Фиерза, на 400 kV.
PECI проектите претставуваат приоритетни инфраструктурни зафати во секторите електрична енергија и гас, кои имаат значително влијание врз повеќе земји членки на Енергетска заедница. Доделувањето на ваков статус овозможува подобра институционална координација меѓу државите учеснички, побрза подготовка и реализација на проектите, како и полесен пристап до меѓународни финансиски инструменти, техничка помош и поддршка од финансиски институции.
Според МЕПСО, реализацијата на проектот ќе придонесе за поголема сигурност и стабилност на електроенергетскиот систем, подобра интеграција на регионалните пазари, намалување на мрежните ограничувања и создавање услови за одржлив развој на енергетскиот сектор во земјата и регионот.
Енергетика 24
