Велика Британија минатата година согорела помалку јаглен отколку во времето на Вилијам Шекспир, покажува анализа на климатскиот портал Carbon Brief. Според податоците, во Обединетото Кралство во 2025 година биле потрошени помалку од еден милион тони јаглен, ниво што последен пат било забележано во времето на кралицата Елизабета I во 16 век, кога недостигот од дрво предизвикал тогашна „енергетска криза“.
Потрошувачката на јаглен е намалена за 56% во споредба со 2024 година, за 97% во однос на 2015 година и за дури 99,6% во споредба со историскиот максимум од 1956 година. Клучна улога во падот одигра затворањето на последната британска термоцентрала на јаглен во есента 2024 година.
Истовремено, потрошувачката на природен гас се намалила за 1,5%, што придонело вкупните емисии на стакленички гасови во Велика Британија да се намалат за 2,4%. Со тоа, емисиите паднале на најниско ниво во последните 150 години и за првпат го надминале дури и минимумот од 1926 година, кога долготрајниот генерален штрајк ја парализирал земјата.
Според анализата, денешните емисии на Обединетото Кралство се на ниво слично на периодот на владеењето на кралицата Викторија во 19 век. Во споредба со 1990 година, тие се намалени за 54%, иако британската економија во меѓувреме речиси се удвоила. Најголем дел од неодамнешниот пад на емисиите се должи на намалената употреба на природен гас, а остатокот на намаленото согорување на јаглен и падот во производството на челик.
Овој тренд е особено значаен ако се има предвид дека Велика Британија е родното место на Индустриската револуција и со векови била силно зависна од јагленот. Првите парни машини од почетокот на 18 век, кои се користеле за испумпување вода од рудниците, работеле токму на јаглен, што дополнително ја зголемило неговата употреба и емисиите на јаглерод диоксид.
Затворањето на последната термоцентрала на јаглен, Ratcliffe-on-Soar кај Нотингем, затоа се смета за историски чекор во британската енергетска транзиција.
Извор: Carbonbrief.org
