Цените на нафтата и натаму бележат раст поради ескалацијата на конфликтот меѓу САД, Израел и Иран и зголемените ризици за снабдувањето преку Ормуски Теснец, низ кој минуваат повеќе од 20% од светската нафта и значителен дел од глобалниот извоз на течен природен гас.
По последните напади врз ирански цели и возвратните удари врз енергетска инфраструктура во регионот, трговијата низ теснецот останува практично блокирана. Ирански медиуми објавија дека водниот пат е затворен и предупредија дека секој брод што ќе се обиде да транзитира може да биде нападнат.
Во такви услови, цената на суровата нафта од типот Brent денес порасна за 3,3% и достигна 84,07 долари за барел, што е највисоко ниво од јануари 2025 година. Американската West Texas Intermediate (WTI) се зголеми за 3%, на 76,8 долари за барел. Во изминатите две трговски сесии двата реперни типа поскапеа за околу 5%, а аналитичарите не очекуваат брза стабилизација.
Според проценките на JPMorgan Chase & Co, доколку блокадата продолжи, извозот од Ирак и Кувајт може да биде прекинат во наредните денови, со потенцијален недостиг од до 4,7 милиони барели дневно на глобалниот пазар. Ирак веќе го намали производството за околу 1,5 милиони барели дневно поради ограничени складишни капацитети и неможност за извоз.
Во меѓувреме, Goldman Sachs Group Inc ја зголеми прогнозата за просечната цена на „Брент“ во вториот квартал од 2026 година за 10 долари, на 76 долари за барел, додека ANZ ја ревидираше својата прогноза за првиот квартал од годинава на 90 долари за барел, сигнализирајќи очекувања за продолжен ценовен притисок.
Американскиот претседател Доналд Трамп најави дека американската морнарица би можела да започне со придружба на танкерите низ Ормускиот Теснец доколку тоа биде неопходно, но аналитичарите оценуваат дека ваквите мерки нема веднаш да ја намалат неизвесноста. Геополитичките ризици, според нив, и понатаму се главниот двигател на растот на цените на нафтата.
Извор: Ројтерс
