Скопје. 18 февруари 2026 – Во јануари 2026 година, согласно податоците на Националниот оператор на пазар на електрична енергија – МЕМО, за задоволување на вкупната нето-потрошувачка во државата продадени се 664 GWh електрична енергија, што претставува највисоко месечно ниво во тековната зимска сезона.
На пазарот се реализирани трансакции од сопствено производство во висина од 614 GWh, при што најголемо учество има ЕСМ со 335 GWh или 54,6% од вкупното домашно производство. Независните производители учествуваат со 192 GWh (31,2%), виртуелните производители со 40 GWh (6,6%), додека повластените производители кои користат повластена тарифа реализирале 47 GWh, односно 7,6% од домашното производство.
Учеството на домашното производство во однос на нето-потрошувачката во јануари изнесува 92,4%, што укажува на високо ниво на покриеност и во услови на изразено зголемена сезонска побарувачка.
Споредба со декември 2025 година
Во однос на декември 2025 година, кога нето-потрошувачката изнесуваше 614 GWh, јануари бележи дополнително зголемување од 50 GWh. Истовремено, домашното производство се зголеми од 605 GWh во декември на 614 GWh во јануари, при што ЕСМ го засили својот удел во вкупниот производствен микс. Овие показатели ја одразуваат типичната зимска динамика, со поизразена потрошувачка и соодветно прилагодување на домашните производствени капацитети.
Извор: МЕМО
