Европската комисија го предложи 20. пакет санкции против Русија, со кој значително се заострува притисокот врз рускиот енергетски сектор,клучен извор на приходи за финансирање на војната во Украина.
Претседателката на Комисијата, Урсула фон дер Лајен, изјави дека санкциите се насочени кон „срцето на руската воена економија“, во услови кога руските сили систематски ја напаѓаат енергетската и грејната инфраструктура во Украина, оставајќи цивилно население без електрична енергија и греење при екстремно ниски температури.
Централна мерка во пакетот е воведувањето целосна забрана за обезбедување поморски услуги за транспорт на руска сурова нафта. Според Европската комисија, оваа одлука дополнително ќе ги намали руските приходи од извоз на енергенси и ќе ја ограничи способноста на Москва да најде нови купувачи. Забраната ќе се применува координирано со земјите од Г7, со оглед на глобалната природа на бродскиот транспорт.
Пакетот предвидува и проширување на санкциите кон таканаречената „сенковна флота“ на Русија, со ставање на црната листа на уште 43 бродови, со што вкупниот број санкционирани пловни објекти достигнува 640. Дополнително, се воведуваат сеопфатни забрани за одржување, поправка и други технички услуги за ЛНГ-танкери и мразокршачи, што директно ги погодува руските проекти за извоз на течен природен гас. Овие мерки се надоврзуваат на претходната забрана за увоз на руски ЛНГ и на регулативата RepowerEU.
Според податоците на Европската комисија, приходите на Русија од нафта и гас во 2025 година се намалиле за 24% во однос на претходната година, што претставува најниско ниво од 2020 година наваму. Истовремено, се зголемува фискалниот дефицит, каматните стапки достигнуваат 16%, а инфлацијата останува висока.
Комисијата оценува дека овие трендови ја потврдуваат ефикасноста на режимот на санкции и најавува негово продолжување и заострување сè додека Русија не покаже подготвеност за сериозни преговори за праведен и траен мир со Украина.
Покрај санкциите, Европската унија обезбедува итна енергетска поддршка за Украина, вклучително и испорака на стотици генератори за стабилизирање на снабдувањето со електрична енергија и греење, со цел да се ублажат последиците од континуираните руски напади врз енергетската инфраструктура.
Извор: Европска комисија
