Белград. 19 јануари 2026 – Министерката за рударство и енергетика на Србија, Дубравка Ѓедовиќ Хандановиќ, изјави дека унгарската компанија МОЛ и руската „Гаспромњефт“ ги договориле основните одредби на идниот купопродажен договор за Нафтната индустрија на Србија (НИС).
Според неа, договорот ќе биде доставен на одлучување до американската Канцеларија за контрола на странски средства (OФАК), а Србија во рамки на преговорите обезбедила зголемување на сопствениот удел во НИС за 5%.
„Она што е особено важно е што Србија ја подобри својата позиција во однос на 2008 година, кога останавме под 30 отсто сопственост. Со зголемувањето на уделот ќе добиеме поголеми права на одлучување во Собранието на акционери и ќе можеме поефикасно да ги заштитиме интересите на граѓаните“, изјави Ѓедовиќ Хандановиќ.
Таа додаде дека се очекува и партнери од Обединетите Арапски Емирати да бидат дел од идниот купопродажен договор.
Претходно, унгарскиот министер за надворешни работи и трговија Петер Сијарто изјави дека МОЛ е во интензивни преговори со компанијата АДНОК од Обединетите Арапски Емирати, оценувајќи дека евентуалната соработка меѓу АДНОК и МОЛ во Србија би претставувала „одлична вест“. За време на посетата на Белград, Сијарто нагласи дека унгарската влада ѝ обезбедува дипломатска поддршка на МОЛ во процесот на преземање мнозински удел во НИС.
Сијарто потсети дека НИС е под американски санкции од октомври 2025 година, но дека Канцеларијата за контрола на странски средства (ОФАК) при Министерството за финансии на САД издала посебна лиценца за оперативна работа до 23 јануари. Со тоа беше овозможен транспортот на сурова нафта до Рафинеријата во Панчево преку Јадранскиот нафтовод (ЈАНАФ), без кој рафинеријата не можеше да работи.
Извор: N1.info.rs
