Рим. 9 јануари 2026– Италијанската влада планира да издвои околу една милијарда евра за ограничување на трошоците за енергија за домаќинствата и компаниите, изјави денеска премиерката Џорџа Мелони, во рамки на мерките за поттикнување на економскиот раст.
На традиционалната новогодишна прес-конференција, Мелони рече дека во 2026 година фокусот на владините политики ќе биде ставен на економскиот раст и безбедноста.
„Оваа влада веќе потроши неколку милијарди евра за да ги задржи цените на енергијата под контрола. Последниот декрет беше донесен пред шест месеци и изнесуваше околу три милијарди евра, а во наредните недели подготвуваме нов, со кој ќе се издвојат уште една милијарда евра“, изјави Мелони.
Премиерката додаде и дека националниот завод за статистика ИСТАТ ја потценува стапката на економски раст, изразувајќи очекување дека податоците за бруто-домашниот производ за 2024 и 2025 година ќе бидат ревидирани.
ИСТАТ во септември веќе значително го зголеми податокот за економскиот раст во 2023 година на 1,0%, од претходно пријавените 0,7%.
„Сметам дека истото може да се случи и со податоците за 2024 и 2025 година“, изјави Мелони.
Извор: Ројтерс
