Брисел. 6 јануари 2026 – Европската комисија објави „сеопфатна проверка“ на законодавството на ЕУ што ја регулира безбедноста на снабдувањето со електрична енергија и гас, како подготовка за негова идна ревизија. Анализата ги опфаќа клучните регулативи за сигурност на снабдувањето со гас и подготвеност за ризици во електроенергетскиот сектор, донесени во 2017 и 2019 година, пред енергетската криза од 2021–2023 година.
Во извештајот се оценува дека постојните регулативи придонеле за стабилно, сигурно и непрекинато снабдување со енергија, како и за заштита на најранливите и критичните потрошувачи. Сепак, Комисијата заклучува дека за време на кризата било неопходно усвојување дополнителни итни мерки, што укажува на потребата од посилен и поцврст сет на правила за справување со идни кризи.
Документот извлекува поуки од претходните енергетски предизвици, вклучително и прекинот на електричната енергија на Пиринејскиот Полуостров во април 2025 година, и ја нагласува потребата од поинтегриран и меѓусекторски пристап кон безбедноста на снабдувањето со гас и електрична енергија.
Врз основа на овие наоди, претстојната ревизија на рамката за енергетска безбедност има цел да обезбеди отпорен и сигурен енергетски систем на ЕУ во услови на брзи промени во енергетскиот, климатскиот и геополитичкиот контекст. Законодавните предлози на Комисијата се очекува да бидат објавени во првата половина на 2026 година.
Комисијата наведува дека анализата овозможила подобро разбирање на новите ризици за енергетскиот систем, вклучувајќи ја заштитата на критичната енергетска инфраструктура од физички и сајбер закани, климатските ризици и последиците од променетата геополитичка состојба.
Процесот бил поддржан и со јавна консултација и повик за доставување докази, во кои учествувале широк круг засегнати страни и граѓани, чии мислења биле вклучени во конечната анализа.
Извор: Европска комисија
