Електропривреда на Црна Гора (ЕПЦГ) минатата недела соопшти дека ја инсталирала најголемата ветерница во Европа, во рамки на ветерниот парк „Гвозд“, со што земјата направи значаен чекор напред во развојот на одржливата енергија и зелената транзиција.
Првата турбина со моќност од 7 мегавати, столб висок 120 метри и лопати долги 85 метри е успешно поставена, со што започнува финалната фаза од реализацијата на проектот. Во наредните недели следува забрзана инсталација на преостанатите турбини, по што ќе бидат спроведени пробни активности и технички тестирања.
Од ЕПЦГ истакнуваат дека „Гвозд“ ќе придонесе за стабилноста и одржливоста на енергетскиот систем на Црна Гора, ќе го зголеми учеството на обновливите извори и ќе ја зајакне позицијата на земјата како регионален лидер во чистата енергија. Проектот е целосно усогласен со европските технички, еколошки и безбедносни стандарди.
Претседателот на Одборот на директори на ЕПЦГ, Милутин Ѓукановиќ, изјави дека поставувањето на најголемата ветерница во Европа претставува „јасна потврда дека Црна Гора може да реализира проекти споредливи со оние во најразвиените европски енергетски системи“. Тој додаде дека поддршката од локалната заедница е клучна и дека „ова е заеднички успех“.
Извршниот директор на EPCG, Бојан Ѓордан, нагласи дека „Гвозд“ е стратегиски проект кој ја позиционира Црна Гора како потенцијален енергетски центар на регионот. „Ова не е само технички подвиг, туку и доказ за организациската сила и експертизата на EPCG“, рече Ѓордан, упатувајќи благодарност до сите тимови и граѓаните за довербата.
Со ваквите инвестиции, EPCG најавува континуирано градење современ, одржлив и отпорен енергетски систем кој долгорочно ќе ја поддржува економијата и граѓаните на Црна Гора. Проектите како „Гвозд“ се оценуваат како темел за стабилност, развој и зелена иднина.
Извор: Epcg.com
