Брисел/Мадрид. 3 октомври 2025 – Масовниот прекин на електрична енергија што на 28 април 2025 година ги зафати континентална Шпанија и Португалија е првиот познат случај на прекин предизвикан од преголем напон, соопшти денеска Европската мрежа на оператори на преносни системи (ENTSO-E) во својот прв извештај.
Извештајот, објавен пред законскиот рок на 28 октомври, не навлегува во корените на инцидентот, туку дава детална хронологија на состојбата на електроенергетскиот систем и настаните што довеле до прекинот, како и процесот на негово обновување.
Според ENTSO-E, ненадејниот преголем напон е непосредната причина за најголемиот прекин на струја во Европа во последните две децении, кој имаше сериозни последици врз граѓаните и економијата на Шпанија и Португалија. Во извештајот се наведува и дека дел од податоците за губење на производство во првите моменти на инцидентот сè уште недостигаат, а сопствениците на електрани тврдат дека не располагаат со нив.
Истражувањето го спроведува панел од 45 експерти од оператори на преносни системи и регулаторни тела од цела Европа. Ова е првиот голем чекор кон конечниот извештај, кој се очекува во првиот квартал од 2026 година и ќе содржи детална анализа на причините и препораки за спречување на слични случаи во иднина.
Извор: ENTSO-E.eu
