Софија. 1 ооктомври 2025 – Државната компанија за снабдување со гас „Булгаргас“ е на раб на банкрот поради долг од над 300 милиони евра поврзан со 13-годишниот договор со турската државна компанија „Боташ“, предупреди премиерот Росен Жељазков.
„На едната страна е иднината на Булгаргас, а на другата – функционирањето на економијата под политички одлуки. Потребни се долгорочни, одржливи решенија, а не краткорочни потези,“ изјави Жељазков за време на вчера одржаниот Стратешки енергетски форум во Софија.
Договорот, потпишан во 2023 година, ѝ наложува на Бугарија да плаќа околу 512.000 евра дневно за резервирање 1,8 милијарди кубни метри гас годишно – капацитет кој досега не е искористен. Наместо да обезбеди замена за рускиот гас, договорот се претворил во финансиски товар, бидејќи Булгаргас плаќа фиксна такса без оглед на количината LNG регасифицирана во Турција и реекспортирана кон Бугарија.
Според премиерот, компанијата веќе е задолжена за над 600 милиони лева (околу 306 милиони евра), а вкупната цена на договорот за целиот период би надминала шест милијарди лева (околу 3,06 милијарди евра).
Во тек се преговори меѓу Боташ и Булгаргас за ревидирање на условите. Експертите предупредуваат дека намалувањето на плаќањата може да значи и намалени испораки, но и дека постои можност за зголемување на волумените ако Бугарија дозволи турски LNG да се дистрибуира преку нејзината територија кон регионот.
Форумот, на кој присуствуваа потпретседателката Илијана Јотова и министрите за енергетика и финансии, ја нагласи потребата од енергетска безбедност и од големи инфраструктурни проекти како клуч за економски развој и регионално влијание.
Жељазков го оцени договорот со Боташ како „погрешна одлука“ која ја става „Булгаргас“ во ранлива позиција и претставува структурен проблем за бугарскиот енергетски сектор.
Извор: Novinite.com
