Стокхолм. 24 септември 2025 – Владата на Шведска најави дека ќе обезбеди заеми во висина до 220 милијарди круни (околу 23,3 милијарди долари) за финансирање на изградба на нови нуклеарни реактори, со што земјата ја засилува стратегијата за развој на нуклеарната енергија.
Министерката за енергија, Еба Буш, изјави дека земјата се наоѓа пред „одлучувачки момент“ во обезбедувањето сигурно и стабилно снабдување со електрична енергија.
Според планот, три до пет модуларни реактори од новата генерација ќе бидат изградени во електраната „Рингхалс“ во југозападна Шведска, со вкупен капацитет од околу 1.500 мегавати – еквивалент на два класични реактори.
Ова ќе биде прво проширување на нуклеарната енергија во земјата по речиси половина век. Шведска во 1980 година на референдум одлучи постепено да се откажува од нуклеарната енергија и досега затвори шест од своите 12 стари реактори.
Во моментов, активните шест реактори обезбедуваат приближно 30 проценти од потребите за електрична енергија на земјата.
Владата објасни дека новата кредитна рамка ќе им овозможи на компаниите поевтино финансирање во споредба со заемите од приватните финансиски институции, при што планираните 220 милијарди круни се предвидени за период од 12 години.
Извор: France24.com
