Москва. 19 септември 2025 – Приходите на Русија од извоз и продажба на нафта и гас во септември се очекува да изнесуваат околу 7,1 милијарда долари, што е пад од 23% во однос на истиот месец лани, според пресметки на Ројтерс. Главни причини за намалувањето се пониските цени на енергенсите на светските пазари и зајакнатиот рубљ, што ја намалува вредноста на извозната добивка во државниот буџет.
Од јануари до септември годинава, приходите од нафтено-гасниот сектор на Русија достигнале вкупно 79,4 милијарди долари, што претставува пад од 20,5% во однос на првите девет месеци од 2024 година. Минатата година Русија оствари рекордни приходи од 133 милијарди долари во овој сектор.
Иако септемвриските приходи ќе бидат за 17% повисоки во споредба со август, благодарение на намалените субвенции кон рафинериите, долгорочниот тренд останува негативен.
Приходите од нафта и гас носат до една четвртина од вкупниот државен буџет и се клучен финансиски столб за руската воена операција во Украина, која влегува во четвртата година. Секое намалување на овој извор директно влијае врз способноста на Кремљ да ги сервисира воените и социјалните трошоци.
И покрај тоа што Русија избегна рецесија во 2023 и 2024 година, економскиот раст забавува. Буџетскиот дефицит годинава е три пати поголем и сега изнесува околу 1,7% од БДП, и покрај зголемувањето на персоналните и корпоративните даноци. Официјалните прогнози за растот се намалени, а дел од финансиските експерти предупредуваат дека економијата се движи кон стагнација или нова рецесија.
Министерството за финансии ќе ги објави официјалните септемвриски податоци за приходите од нафта и гас на 3 октомври. Првичната проекција за 2025 година предвидуваше около 120 милијарди долари приходи, но прогнозата е ревидирана надолу – на приближно 91 милијарда долари, односно околу 5% од БДП.
Со најновата буџетска промена што стапува на сила идната година, властите се обидуваат да ги ублажат ефектите од флуктуациите на цената на нафтата и западните санкции. Но, аналитичарите предупредуваат дека просторот за маневар се намалува, а зависноста од енергетските приходи останува слабата точка на руските финансии.
Извор: Ројтерс
