Канада и САД остануваат на врвот на светската листа според потрошувачка на електрична енергија по жител, додека Кина во последните две децении бележи драматичен раст и денес троши повеќе струја по човек отколку Велика Британија, Франција и Германија, покажуваат податоците од Ember Electricity Data Explorer.
Канада го држи првото место со просечна годишна потрошувачка од 15.708 kWh по жител, иако бројката е нешто пониска во споредба со 2000 година. Енергетски интензивните индустрии како рударството и производството на алуминиум, заедно со потребата од греење во долгите и студени зими, се клучните фактори за високата потрошувачка.
САД се на второ место со 12.741 kWh. Огромната инфраструктура, масовната употреба на клима-уреди и присуството на тешка индустрија придонесуваат за високата побарувачка.
Најголемото изненадување доаѓа од Кина, каде што потрошувачката по жител е зголемена од 1.061 kWh во 2000 година на 7.097 kWh во 2024 година. Овој раст од речиси 569% е резултат на забрзаната индустријализација, урбанизација и зголемувањето на животниот стандард.
Со тоа, Кина ја престигна Велика Британија, која забележа пад од 30% во истиот период и сега троши само 4.590 kWh по жител, но и Франција и Германија, кои исто така се под кинеското ниво.
Во европските земји трендот е релативно стабилен или со благо опаѓање. Германија, со 5.984 kWh, и Франција, со 7.028 kWh, се во средината на табелата. Велика Британија, пак, бележи најголем пад меѓу развиените земји.
Од друга страна, Индија и Мексико остануваат на дното на листата со 1.397 и 2.736 kWh по жител. Иако бројките се ниски во однос на светскиот просек од 3.788 kWh, и двете земји бележат континуиран раст во последните две децении.
Анализата на Ember ја потврдува врската меѓу економскиот развој и потрошувачката на електрична енергија: земјите со силна индустрија и урбани центри бележат значително повисоки нивоа на употреба. Трендовите упатуваат дека земјите во развој ќе ја зголемуваат потрошувачката во наредните години, следејќи го патот на сегашните индустриски сили.
Потрошувачка на електрична енергија по жител (2000 – 2024)
| Ранг | Држава | Потрошувачка по жител, 2000 година (kWh) | Потрошувачка по жител, 2024 година (kWh) | Промена (%) |
|---|---|---|---|---|
| 1 | Канада | 18.386 | 15.708 | -14,6% |
| 2 | САД | 13.627 | 12.741 | -6,5% |
| 3 | Јужна Кореја | 6.211 | 12.092 | +94,7% |
| 4 | Австралија | 11.333 | 10.543 | -7,0% |
| 5 | Русија | 5.887 | 8.237 | +39,9% |
| 6 | Jапонија | 8.657 | 8.213 | -5,1% |
| 7 | Кина | 1.061 | 7.097 | +568,9% |
| 8 | Франција | 7.785 | 7.028 | -9,7% |
| 9 | Германија | 6.993 | 5.984 | -14,4% |
| 10 | Шпанија | 5.494 | 5.639 | +2,6% |
| 11 | Италија | 5.488 | 5.316 | -3,1% |
| 12 | Обединето Кралство | 6.625 | 4.590 | -30,7% |
| 13 | Бразил | 2.252 | 3.589 | +59,4% |
| 14 | Мексико | 2.073 | 2.736 | +32,0% |
| 15 | Индија | 541 | 1.397 | +158,2% |
| 16 | Свет (просек) | 2.476 | 3.788 | +53,0% |
Извор: Visualcapitalist.com
