Уксбриџ. 27 август 2025 – Глобалната транзиција кон батериски електрични возила (BEV) напредува, но со различно темпо низ регионите. Во првиот квартал од 2025 година, BEV достигнаа 14,5% удел во светскиот пазар, додека моторите со внатрешно согорување изгубија 34,4 процентни поени од 2019 година.
Кина убедливо ја предводи оваа промена со 57% од сите глобални регистрации на BEV, следена од проширена Европа со 22% и САД со 12%. Индивидуалниот удел на другите земји останува под 2%, вклучително и Индија (1,7%), Јужна Кореја (1,2%) и Турција (1,1%). Главен фактор за брзиот раст на Кина е ценовната пристапност – разликата во цените меѓу електричните и конвенционалните автомобили таму се намали за околу 15% во последните шест години, а во некои сегменти BEV веќе се поевтини од возилата со класичен мотор.
За разлика од тоа, во Европа и САД преминот се одвива поспоро. Иако Европа долго беше меѓу најгласните промотори на електрификацијата, сè погласни се сомнежите околу плановите за забрана на продажба на автомобили со мотори со внатрешно согорување по 2035 година. Цените, инфраструктурата и конкурентноста на индустријата се меѓу клучните дилеми. Во САД, пак, иако ценовната разлика во однос на класичните возила се намали од 44% во 2019 на 31% годинава, пазарот сè уште се соочува со проблеми во инфраструктурата и непостојани државни политики.
Разлики постојат и во технолошките приоритети. Кина масовно користи поевтини LFP батерии, кои обезбедуваат пристапни цени, но со помал опсег на возење. Западните пазари, напротив, се фокусираат на батерии со поголем капацитет и побрзо полнење, одговарајќи на стравот на потрошувачите од ограничен опсег и недостапна инфраструктура.
И покрај различното темпо, едно е јасно: електричните возила веќе се втора најпродавана погонска технологија во светот. Кина ја води промената преку пристапност и масовно производство, додека Европа и САД се натпреваруваат во технолошка супериорност. Прашањето повеќе не е дали ќе се случи целосна транзиција кон електрична мобилност, туку колку брзо и на кој начин ќе ја прифатат различните региони.
Извор: Jato.com
