Стокхолм. 27 август 2025 – Минатата недела, Шведска објави дека за првпат по половина век ќе гради нови нуклеарни капацитети, при што за проширувањето на производството на енергија ќе бидат користени мали модуларни реактори (SMR).
Владата најави изградба на три до пет реактори во електраната Рингхалс, на југозападот од земјата. Со нив ќе се обезбедат околу 1.500 мегавати електрична енергија – еквивалент на два класични реактори.
„За првпат по 50 години ќе се гради нова нуклеарна енергија во Шведска,“ изјави премиерот Улф Кристерсон.
Иако земјата во 1980 година со референдум се изјасни за постепено укинување на нуклеарната енергија, политичкото мнозинство денес поддржува продолжување и модернизација на капацитетите, заедно со развојот на обновливи извори, со цел намалување на користењето фосилни горива.
Државната компанија Ватенфал разгледува понуди од британската „Ролс-Ројс“ и американската „ЏИ Вeрнова“ за изградбата, а плановите се реакторите да бидат пуштени во употреба околу 2035 година.
Во моментов Шведска има шест активни реактори кои обезбедуваат околу 30% од вкупната потрошувачка на струја.
Иако малите модуларни реактори се сметаат за поевтина и пофлексибилна технологија, таа сè уште е во експериментална фаза, со мал број проекти реализирани на глобално ниво.
Еколошката организација „Гринпис“ ја критикуваше владината иницијатива како „нејасна и скапа“, предупредувајќи дека недостигаат јасен буџет, временска рамка и дозволи за градба. Според нив, новата нуклеарна енергија ќе бара рекордни државни субвенции, ќе го одложи процесот на електрификација на индустријата и ќе биде поскапа и поштетна за климата од инвестиции во обновливи извори.
Извор: Euractive.com
