Siemens Energy и Končar започнуваат еден од најголемите глобални проекти за производство на трансформаторски котли
Загреб. 28 јули 2025 – Siemens Energy AG донесе официјална одлука за голема инвестиција во Хрватска, вредна над 80 милиони евра, во соработка со компанијата Končar – Енергетски трансформатори. Станува збор за проектот „KPT2“, кој спаѓа меѓу најголемите глобални вложувања во енергетскиот сектор во моментов.
Изградбата ќе се реализира на локацијата во Сесветски Кралевец, каде веќе започнаа подготвителни активности. Производниот капацитет ќе биде наменет за трансформаторски котли, клучна компонента во трансформаторите, чија побарувачка бележи историски раст поради забрзаната зелена енергетска транзиција во Европската Унија.
Во новата фабрика ќе бидат вработени околу 400 лица, а првичните проценки предвидуваат дека ќе генерира приходи од над 60 милиони евра годишно, што е зголемување од два и пол пати во однос на сегашните капацитети на Končar.
Министерот за економија на Хрватска, Анте Шушњар, ја поздрави одлуката на Siemens, оценувајќи ја како „потврда дека инвестициската клима во земјата никогаш не била подобра“. Според Шушњар, Хрватска ги победи силните конкуренти како Чешка, Италија, Шпанија, Шведска и Велика Британија благодарение на конкурентни оперативни трошоци, обучена работна сила, стабилна инфраструктура и европски законодавен оквир.
Siemens Energy, кој поседува 51% од заедничката компанија Končar – Енергетски трансформатори, со оваа одлука дополнително ја зацврстува својата долгорочна посветеност кон Хрватска како стратешка локација за енергетска индустрија, не само во регионот и Европа, туку и на глобално ниво.
Проектот е резултат на продолжена повеќедецениска соработка меѓу двете компании, традиција што започна уште во 1921 година кога Siemens беше основач на оригиналната фабрика, а е обновена во 1994 година со формирањето на заедничкото претпријатие. Постојната фабрика во Јанкомир денес се вбројува меѓу најдобрите производители на големи трансформатори во светот.
Извор: Јутарњи Лист
