Скопје. 4 јули 2025 – Во јуни 2025 година, на пазарот за тргување со електрична енергија ден однапред, на Македонската берза се истргувани вкупно 94.654,8 MWh, покажува најновиот извештај на Националниот оператор на пазар на електрична енергија – МЕМО ДООЕЛ Скопје.
Просечната цена по мегават-час изнесува 5.201,36 денари, односно 84,42 евра, што претставува благо зголемување во однос на мај.
Дневниот просек на тргувана електрична енергија во јуни достигна 3.155 MWh, што е значителен пораст во однос на мајските 2.785 MWh дневно. 
Во периодот на дневен пик (09:00 – 20:00 часот), биле тргувани 2.059 MWh дневно, по намалена просечна цена од 3.351,1 денари или 54,4 евра по MWh – што укажува на поволни услови за потрошувачите токму во часовите на најголема активност.
Податоците потврдуваат тренд на зголемена трговска активност и стабилизирање на цените, особено за време на пик-термините, што може да се поврзе со подобрено производство и пооптимална распределба на ресурсите во енергетскиот систем.
Извор: МЕМО
