Белград. 16 мај 2025 – Термоелектраните во Србија и натаму испуштаат значително повисоки количини на сулфур и прашина отколку што дозволуваат стандардите на Европската унија и Енергетската заедница (ЕЗ), изјави директорот на Секретаријатот на ЕЗ, Артур Лорковски, на седница на собранискиот Одбор за економија и енергетика.
Лорковски нагласи дека Србија мора да ги затвори постоечките загадувачки капацитети за производство на електрична енергија и да премине кон обновливи извори. „Нивото на емисии од големите постројки, како што се термоелектраните, и понатаму не е усогласено со прописите што ЕЗ ги усвои уште во 2018 година“, рече тој.
Во најновиот извештај за напредокот на Србија во усогласувањето со енергетските регулативи за 2024 година, Секретаријатот забележува низа слабости. Меѓу нив се и недовршената сертификација на компанијата „Југоросгас-Транспорт“, како и тоа што операторот на складиштето за гас „Банатски двор“ сè уште не е одвоен во согласност со регулативата за складирање гас. Исто така, не е обезбеден пристап за трети страни до системите за пренос и складирање на гас. 
Лорковски оцени дека и понатаму постои висок степен на монополизација на енергетските пазари во Србија, и во големопродажбата и во малопродажбата. Иако гасниот интерконектор со Бугарија е завршен и технички подготвен, неговото целосно комерцијално користење сè уште не е започнато.
Од позитивните поместувања, Лорковски го истакна воспоставувањето на систем за следење на емисиите на гасови, како и првите издадени дозволи за емисии. Дополнително, тој ја поздрави и посветеноста на Србија за развој на обновливи извори и подобрување на енергетската ефикасност.
Министерката за рударство и енергетика, Дубравка Ѓедовиќ Хандановиќ, истакна дека Србија е лидер во регионот во имплементација на енергетски реформи. Таа потсети дека е завршен процесот на сертификација на „Транспортгас“, а дека до крајот на годината ќе бидат донесени уште три закони во енергетскиот сектор, меѓу кои и за пазарите на нафта и гас.
„До крајот на 2025 година, ќе биде завршен системот за отпрашување на термоелектраната „Никола Тесла Б“, а 90% од термоелектранските капацитети ќе имаат високо ниво на заштита на животната средина“, изјави министерката. Таа додаде дека до 2030 година, половина од електричната енергија во Србија ќе се произведува од обновливи извори.
И покрај одредените успеси, извештајот на Енергетската заедница покажува дека Србија има уште многу работа пред себе доколку сака целосно да се усогласи со енергетските и еколошките стандарди на Европската унија и да го обезбеди стабилниот пат кон европската интеграција.
Извор: Данас
