Љубљана. 7 Mај 2025 – Словенечките домаќинства минатата година плаќале пониски цени за електрична енергија од просекот на Европската унија, додека тарифите за индустриски и комерцијални потрошувачи биле меѓу највисоките во Унијата, покажува анализа на националниот оператор на преносниот систем, ELES.
Извештајот, изработен од извршниот директор на ELES, Александар Мервар, открива дека цените за домаќинствата останале ниски главно благодарение на владините мерки за заштита на потрошувачите. Од јануари до крајот на октомври 2024 година, Владата постави максимални цени за 90% од потрошената електрична енергија: 8.2 евроценти по kWh во ниска и 11.8 евроценти во висока тарифа. Дополнително, беше замрзната наплатата на надоместот за поддршка на обновливи извори и високоефикасна когенерација.
Според проценките, без овие интервенции, сметката на просечно словенечко домаќинство со годишна потрошувачка од 4.000 kWh би била повисока за речиси 346 евра или 46%. 
Од друга страна, цените за бизнисите останале високи во споредба со другите земји-членки. Сепак, просечната комерцијална цена на електричната енергија во Словенија била пониска од онаа во соседните држави, а ELES остро ги отфрли тврдењата на Стопанската комора дека високите мрежни такси ја поткопуваат конкурентноста на компаниите.
„Мрежните надоместоци за индустријата се дури 36.5% до 49% пониски од просекот во ЕУ, а за домаќинствата се меѓу најниските во Унијата,“ стои во анализата на операторот. Исто така, трошоците за пренос се за 53% пониски отколку во соседните земји.
На регионално ниво, цените за домаќинствата во Словенија биле повисоки од тие во Хрватска и Унгарија, но пониски од Австрија и Италија. На ниво на ЕУ, најевтина електрична енергија имале домаќинствата во Бугарија, Малта, Луксембург, Унгарија и Хрватска.
Кога се споредува со куповната моќ, цените за словенечките потрошувачи се во долната половина на листата од 27 членки на ЕУ, што ја позиционира Словенија како земја со релативно пристапна енергија за домаќинствата, но со значителен товар за деловниот сектор.
Извор:Nas-stik.si
