Копенхаген. 04 Мај 2025 – По децении остро противење, Данска би можела да ја преиспита својата децениска забрана за нуклеарна енергија, откако една од владејачките партии најави подготвеност за започнување јавна дебата за можноста за воведување на овој енергетски извор.
Партијата на Модератите (Moderaterne), која е дел од владината коалиција, најави дека е „спремна да ја укине забраната за нуклеарна енергија“, изјави партискиот портпарол за климатски прашања, Хенрик Франдсен, во интервју за националниот медиум DR.
Данска ја забрани нуклеарната енергија во 1985 година, дури и пред катастрофата во Чернобил, под притисок на јавната перцепција за опасноста и несаканите ризици. Последниот истражувачки реактор во земјата е затворен пред повеќе од дваесет години, а државата, заедно со Германија и Австрија, долго време важеше за еден од најтврдокорните противници на нуклеарната енергија во Европската Унија. 
Но, како што глобалната енергетска политика се менува, и данската дебата добива нова насока. Денешните дискусии се фокусирани не толку на безбедносните аспекти, туку на економската исплатливост и техничката одржливост на нуклеарната енергија во рамки на данскиот енергетски систем.
Се поставуваат прашања: Дали нуклеарната енергија е премногу скапа, премногу бавна за реализација и несоодветна за високо-декарбонизираниот модел што Данска го следи со години?
Според анкета спроведена минатата година, 55% од данските граѓани би гласале за укинување на забраната за нуклеарна енергија, доколку се одржи референдум. Ова претставува значајна промена во јавното мислење и отвара можност за значаен пресврт во енергетската политика на земјата.
Иако нуклеарната енергија засега не е дел од официјалниот енергетски план на Данска, најавената отвореност кон дебата и потенцијално законско олеснување означуваат нова фаза – каде што националната стратегија би можела да се прошири надвор од досега доминантните обновливи извори како ветерот и соларната енергија.
Извор:Doi.dk
