Тирана. 2 мај 2025 – Владата на Албанија одобри изградба на два нови фотоволтаични (PV) проекти со вкупен инсталиран капацитет од 54 мегавати (MW), се наведува во соопштение објавено оваа недела.
Компанијата за обновливи извори на енергија EZ-5 Energy, основана во 2019 година, доби дозвола да изгради соларен парк со капацитет од 30 MW во близина на градот Фиер, во југозападниот дел на земјата. Според владината одлука, проектот треба да се реализира во рок од три години, по што EZ-5 Energy ќе управува со електраната во наредните 46 години.
Истовремено, компанијата GET Solar Solution, основана во 2023 година, доби одобрение да изгради соларен парк со капацитет од 24 MW во општината Колоње, југоисточна Албанија. Условите за реализација и периодот на управување со овој проект се идентични со оние за проектот на EZ-5 Energy. 
Според податоците од албанскиот трговски регистар, EZ-5 Energy првично била основана под името Kastrati Energy од страна на конгломератот Kastrati Group, активен во нафтениот и градежниот сектор, и инвеститорот Алтин Кодра. Во 2020 година, Kastrati Group го продала својот удел од 80% на сегашниот единствен сопственик, Едмонд Адемај.
GET Solar Solution, пак, е во сопственост на локалниот претприемач Тарион Бала, кој ја основал компанијата минатата година со цел развој на обновливи енергетски капацитети.
Новите проекти претставуваат дел од напорите на Албанија за зголемување на уделот на обновливи извори во националниот енергетски микс, со цел намалување на зависноста од хидроелектричната енергија и поголема енергетска стабилност.
Инаку, во 2024 година, албанските власти доделија лиценци за производство на електрична енергија од сонце со вкупен капацитет од околу 470 MW . Овие проекти се во различни фази на развој и се очекува да придонесат за дополнително намалување на зависноста од хидроенергијата, која традиционално доминира во енергетскиот микс на земјата.
Албанија има амбициозна цел да достигне 1 гигават (GW) инсталиран соларен капацитет до 2030 година. Според проценките на BloombergNEF, земјата би можела да додаде до 800 MW соларен капацитет до крајот на деценијата, што би претставувало 29-кратно зголемување во однос на нивото од 2022 година.
Извор: SeeNews.com
