Прага. 18 април 2025 – Чешка за првпат започна да добива нафта исклучиво од не-руско потекло преку проширувањето на Трансалпскиот нафтовод (TAL-PLUS). Свечената церемонија по овој повод се одржа во седиштето на компанијата MERO, оператор на чешката мрежа на магистрални нафтоводи, во присуство на премиерот Петр Фиала, министерот за финансии Збинек Станјура и генералниот директор на MERO, Јарослав Пантучек.
Првата зголемена испорака на нафта од пристаништето во Трст, Италија, пристигна на централната нафтена база во Нелахозевес на 17 април 2025 година. Нафтата ќе се транспортира до рафинеријата во Литвинов, со што двете чешки рафинерии во Кралупи и Литвинов, во сопственост на Orlen Unipetrol, ќе можат да обработуваат до 8 милиони тони нафта годишно. Ова ја покрива целата годишна потреба на Чешка, овозможувајќи целосна замена на руската нафта од нафтоводот „Дружба“.
На церемонијата, премиерот Фиала истакна дека ова е чекор кон енергетска независност, додека директорот Пантучек потврди дека нафтоводот „Дружба“ останува оперативен и подготвен за евентуално обновување на испораките. 
Инаку патот до оваа цел започна во 1994 година со изградбата на нафтоводот IKL, кој ја поврза чешката нафтена инфраструктура со западните нафтоводни мрежи. Клучен исчекор беше направен во 2012 година, кога MERO купи 5% удел во конзорциумот TAL, кој управува со Трансалпскиот нафтовод. Преговорите за TAL-PLUS започнаа во 2015 година, но реализацијата почна дури во 2022 година. Во мај 2023 година, MERO потпиша договор за проширување, а максималниот капацитет од 8 милиони тони нафта годишно беше постигнат кон крајот на 2024 година. Ова овозможи Чешка целосно да се ослободи од руската нафта, зајакнувајќи ја својата енергетска сигурност.
Извор: Mero.cz
