Хрватска го доби својот прв голем самостоен батериски систем за складирање електрична енергија, со инсталирана моќност од 60 мегавати и капацитет за складирање од 120 мегават-часови. Објектот, изграден во близина на Шибеник, беше официјално пуштен во работа во средата, а се очекува да има значајна улога во балансирањето на електроенергетскиот систем и одржувањето на стабилноста на мрежата.
Инвестицијата ја реализираше компанијата „НГЕН“ (NGEN), а батерискиот систем е поставен во индустриската зона ИМПОЛ-ТИ-ЕЛ-ЕМ (IMPOL-TLM). Тој е директно поврзан со преносната електроенергетска мрежа на Хрватска на напонско ниво од 110 киловолти и обезбедува автоматска резерва за обновување на фреквенцијата за хрватскиот оператор на преносниот систем ХОПС (HOPS).
Иако официјалното отворање се одржа оваа недела, системот веќе од септември ја обезбедува услугата за балансирање на електроенергетската мрежа.
Сопственик на објектот е проектната компанија „НекстГрид Енерџи“ (NextGrid Energy), во која учествуваат хрватската компанија ИЕ Енерџи (IE Energy), Европската банка за обнова и развој (ЕБОР) и пензиските фондови „Рајфајзен“. Технолошката реализација му е доверена на словенечкиот „НГЕН“, кој е и партнер на ИЕ Енерџи во Хрватска.
Вкупната вредност на инвестицијата изнесува 60 милиони евра, од кои една четвртина се обезбедени преку европски средства од Фондот за модернизација.
Од „НГЕН“ информираат дека за проектот развиле специјална софтверска платформа и систем за управување што овозможуваат целосно автоматизирано работење. Платформата континуирано ги следи состојбите на пазарот и во електроенергетската мрежа, а на секои 15 минути го оптимизира работењето на батерискиот систем во согласност со пазарните услови.
На тој начин, објектот може да учествува на пазарите за балансирање и во реално време да одговори на барањата на операторот на преносниот систем.
Извршниот директор на „НекстГрид Енерџи“, Жељко Шмитран, на социјалната мрежа „Линкдин“ посочи дека батерискиот систем е целосно пазарно ориентиран и нема гарантирани приходи ниту однапред обезбедена побарувачка за неговите услуги.
Според него, системот работи кога на електроенергетскиот систем му е потребна поддршка, додека инвеститорите го преземаат пазарниот ризик.
Шмитран оценува дека најголем предизвик во реализацијата на проектот било обезбедувањето капитал од пазарот, бидејќи станува збор за инвестиција без претходно воспоставен модел на финансирање во Хрватска.
Успехот, како што наведува, бил овозможен со соодветниот редослед на вклучување на инвеститорите. Средствата од Фондот за модернизација најпрво го намалиле инвестицискиот ризик, по што во проектот се приклучиле ЕБОР и пензиските фондови „Рајфајзен“.
За ЕБОР, ова воедно претставува и прва капитална инвестиција во самостоен комерцијален батериски систем за складирање електрична енергија.
Со овој проект Хрватска добива нов капацитет за флексибилност на електроенергетскиот систем, особено важен во услови на растечко производство од обновливи извори, чие производство зависи од временските услови. Батериските системи овозможуваат побрзо балансирање на понудата и побарувачката, обезбедување системски услуги и поефикасно управување со електроенергетската мрежа.
Извор: Ngen-Group.eu
