Соларните панели може да произведуваат електрична енергија и 25 до 30 години, но со текот на времето нивната ефикасност постепено опаѓа, што ги поставува сопствениците пред дилемата дали да инвестираат во поправка на постојниот систем или да го заменат со нова опрема.
Одлуката зависи пред сè од староста на панелите, обемот на оштетувањата и трошоците за поправка во споредба со цената на нова инсталација. Иако поправката на постојниот систем во многу случаи може да биде значително поевтина опција, кај опрема што се приближува до крајот на работниот век, дополнителните вложувања не секогаш се економски оправдани.
Според анализата објавена на порталот „Би-Џи-Ар“ (BGR), една од најчестите ситуации во кои се отвора ова прашање е замената на покривот на објектот. Бидејќи соларните панели се поставуваат врз конструкција прицврстена за покривната површина, при поголеми зафати на покривот неопходно е прво да се демонтираат панелите, носачите и придружната електрична инсталација.
По завршувањето на градежните работи, сопствениците имаат неколку можности: повторно да го инсталираат постојниот систем, претходно да ги поправат оштетените компоненти, да постават нова соларна опрема или целосно да се откажат од повторна инсталација.
Финансиската пресметка е особено важна во вакви случаи, бидејќи трошоците за демонтажа и повторна монтажа се дополнителен издаток, независно од тоа дали ќе се задржи старата или ќе се купи нова опрема.
Според податоците наведени во анализата, повикувајќи се на платформата „Анџи“ (Angi), просечната цена за замена на покривниот материјал на една куќа изнесува околу 9.600 долари. Демонтажата на соларните панели од покривот може да чини од 1.000 до 3.500 долари, што значи дека вкупните почетни трошоци за овие активности можат да достигнат околу 12.000 долари.
Трошоците за поправка на соларните панели се движат од 100 до 4.700 долари, но можат да бидат и значително повисоки доколку е потребна замена на батерискиот систем или инвертерот. За демонтажа и повторна монтажа на панелите, пак, се наведува ценовен опсег од 1.500 до 6.000 долари.
Наспроти тоа, просечната цена за набавка и инсталација на нов соларен систем изнесува околу 27.000 долари. Оваа разлика покажува дека поправката и повторното поставување на постојната опрема може да донесат значителни заштеди, доколку системот сè уште има доволно долг преостанат работен век.
Како едно од основните правила за носење одлука, анализата посочува дека ако трошоците за поправка достигнат 50% или повеќе од цената на новите панели, замената најчесто е поисплатлива опција. Особено внимание треба да се посвети и на состојбата на инвертерот и батериите, бидејќи нивната замена може значително да ја зголеми вкупната инвестиција.
Дополнителен фактор е и влијанието на соларната инсталација врз пазарната вредност на недвижноста. Истражување на американската платформа „Зајлоу“ (Zillow), наведено во анализата, покажува дека домовите со соларни панели на покривот во просек се продаваат за 4,1% повисока цена во споредба со објектите без ваква опрема. Кај дом со медијална вредност од околу 366.000 долари, тоа би значело приближно 9.300 долари повисока продажна цена.
Сепак, повисоката вредност на недвижноста не значи автоматски дека секоја поправка или замена ќе се исплати. За сопствениците кои планираат да го продадат објектот во блиска иднина, вреди да се земе предвид потенцијалното влијание на соларната инсталација врз продажната цена, додека за оние кои планираат подолгорочно да живеат во него, поважна е пресметката на идните заштеди на сметките за електрична енергија.
Во анализата се нагласува и потребата демонтажата и повторното поврзување на системите да им се доверат на овластени стручни лица. Ангажирањето неовластени изведувачи во одредени случаи може да доведе до губење на гаранцијата од производителот, а во некои американски сојузни држави и општини постојат и законски барања за ангажирање лиценцирани професионалци заради исполнување на градежните и електричните стандарди.
Заклучокот е дека староста на соларните панели сама по себе не треба да биде единствениот критериум за одлука. Клучна е споредбата меѓу трошоците за поправка, преостанатиот работен век на опремата и очекуваните заштеди од производството на сопствена електрична енергија. Кога постојниот систем е во добра сос
Извор: BGR.com
