Матичната компанија на рускиот енергетски гигант „Гаспром“ остварила нето-добивка од околу 1,28 милијарди евра во првите девет месеци од 2026 година, наспроти загубата од околу 1,90 милијарди евра во истиот период лани, покажува финансискиот извештај на компанијата подготвен според руските сметководствени стандарди (РСБУ).
Приходите во периодот јануари-септември достигнале околу 49,52 милијарди евра, што претставува раст од 4% во однос на истиот период минатата година.
Подобрување е забележано и во третиот квартал, кога матичната компанија остварила нето-добивка од околу 406 милиони евра. За споредба, во вториот квартал годинава имала загуба од околу 772 милиони евра, додека во третиот квартал лани загубата изнесувала приближно 1,78 милијарди евра.
Од „ИнфоТЕК“ посочуваат дека извештајот според РСБУ се однесува на матичната компанија, а не на консолидираните резултати на целиот холдинг. На претходните финансиски резултати влијаеле отпишувањето на средства и зголеменото даночно оптоварување, кое ги зголемувало месечните обврски за околу 558 милиони евра. Според анализата на изданието, дополнителните даночни плаќања биле укинати минатата година, додека пазарните услови значително се подобриле во 2026 година.
Покрај подобрените финансиски резултати, „Гаспром“ соопшти дека на 1 ноември го достигнал историскиот максимум на дневни испораки на природен гас во Кина преку гасоводот „Силата на Сибир“. Испораките се реализираат врз основа на долгорочниот договор за купопродажба на гас меѓу руската компанија и кинеската национална нафтена корпорација ЦНПЦ.
Кина останува еден од клучните пазари за „Гаспром“, кој е најголем снабдувач на земјата со природен гас преку гасоводи. Во текот на минатата година во Кина биле испорачани 38,8 милијарди кубни метри гас, а според проценката на рускиот вицепремиер Александар Новак, испораките во 2026 година би можеле да достигнат 50 милијарди кубни метри.
Во анализата на „ИнфоТЕК“ се наведува дека компанијата ги задржува позициите и на европскиот пазар, каде што цените на испораките се поврзани со берзанските котации во Европската Унија. Порастот на цените на европските трговски платформи, меѓу кои и холандскиот центар ТТФ, постепено се одразува врз цените на рускиот гас што се испорачува според долгорочни договори.
Бидејќи усогласувањето на договорните цени се врши на квартална основа, ефектите од поскапувањето на гасот на европските пазари се пренесуваат со одредено временско поместување. Според оценката на „ИнфоТЕК“, позначително влијание се очекува во четвртиот квартал од 2026 година и во првиот квартал од 2027 година.
Дополнително, руската компанија ги зголемува испораките за потрошувачите во земјите од Централна Азија, додека Турција останува еден од поголемите увозници на руски гас. Според анализата, и европскиот и турскиот пазар се соочуваат со последиците од кризата на Блискиот Исток, која влијае врз глобалната понуда и цените на природниот гас.
Извор: Itek.ru
