Цените на нафтата денеска пораснаа за речиси 3%, откако новите напади врз енергетската инфраструктура на Саудиска Арабија и нападите врз бродови во регионот дополнително ги зголемија стравувањата за глобалното снабдување со нафта.
Фјучерсите на Брентот пораснаа за 2,93 долари, или 2,8%, на 107,54 долари за барел, додека американската нафта WTI поскапе за 2,88 долари, или 2,9%, на 102,93 долари за барел, до 7 часот по Гринич.
Новиот раст следува по затворањето на клучниот саудиски Источно-западен нафтовод, кој овозможува дел од извозот на Саудиска Арабија да го заобиколи Ормускиот теснец. Според проценките цитирани од Ројтерс, прекинот на работата на нафтоводот може да загрози снабдување еквивалентно на до 4% од глобалната понуда на нафта.
„Ова следува по засилувањето на нападите врз саудиската енергетска инфраструктура, вклучително и нападот врз клучниот Источно-западен нафтовод“, наведоа стратезите за суровини од ING, додавајќи дека сè уште не е јасно колкава е штетата и колку долго нафтоводот ќе биде надвор од функција.
Со прекинот на нафтоводот, терминалот Јанбу на Црвеното Море има залихи за само пет до седум дена извоз, според три извори од индустријата запознаени со саудискиот извоз.
Дополнителен ризик за транспортот на нафтата претставува и ситуацијата во Ормускиот теснец, каде што во неделата беше погоден брод од проектил, по што избувнал пожар и екипажот бил евакуиран, соопшти британската агенција за поморска безбедност UKMTO.
Иран соопшти дека едно лице загинало, а четворица членови на екипажот биле повредени кога бил погоден ирански трговски брод во близина на иранскиот брег.
Ризиците се прошируваат и кон Баб ел-Мандеб, уште еден важен коридор за транспорт на нафта. Хутите, кои се сојузници на Иран, во петокот стигнале до стратешкиот остров Перим, со што дополнително ја зајакнуваат позицијата во близина на теснецот преку кој во последните месеци се транспортирале околу 4% до 5% од глобалното снабдување со нафта.
Цените на нафтата минатата недела пораснаа за околу 8%, надминувајќи го прагот од 100 долари за првпат од јули, поради нарушувањата во снабдувањето.
Дополнително, планираната средба меѓу земјите од Заливот и Иран во Оман, на која требало да се разговара за Ормускиот теснец, е одложена. Ова го потврди оманскиот министер за надворешни работи Бадр Албусаиди.
Речиси шест месеци по почетокот на војната меѓу САД, Израел и Иран, засега нема нови мировни преговори. Последниот обид за договор во јуни пропадна, оставајќи ги пазарите изложени на ризикот од продолжени нарушувања на снабдувањето со енергенси.
Извор: Ројтерс
