Соединетите Американски Држави воведоа нови ограничувања за странски произведените соларни инвертори, повикувајќи се на ризици за националната безбедност и можни сајбер-напади врз електроенергетската инфраструктура. Новите правила ќе важат за идните модели на инвертори што допрва треба да добијат одобрение за продажба на американскиот пазар, додека веќе сертифицираната опрема останува непроменета.
Одлуката ја донесе Бирото за јавна безбедност и домашна безбедност при Федералната комисија за комуникации (FCC), кое ги додаде странски произведените мрежно поврзани инвертори на т.н. „Covered List“ – листа на опрема за која се смета дека може да претставува ризик за безбедноста на американските комуникациски и енергетски системи.
Според новите правила, сите модели на инвертори што сè уште немаат добиено FCC-сертификација нема да можат да бидат одобрени доколку се произведени надвор од САД. Од друга страна, сите модели што веќе поседуваат одобрение остануваат достапни за увоз, продажба и инсталација, што значи дека краткорочно не се очекуваат поголеми нарушувања кај проектите кои веќе се во изградба.
Страв од сајбер-напади врз електроенергетската мрежа
Американската администрација оценува дека современите „паметни“ инвертори, кои имаат можност за далечинска комуникација и ажурирање на фирмверот преку интернет, потенцијално би можеле да бидат злоупотребени за сајбер-напади врз критичната енергетска инфраструктура.
Одлуката доаѓа и покрај тоа што Министерството за енергетика на САД претходно анализираше 30 кинески инвертори без да пронајде докази за вградени злонамерни компоненти. Според Белата куќа, главниот ризик не произлегува од самиот хардвер, туку од можноста за далечинско преземање контрола врз уредите преку нивните комуникациски системи.
Ограничувањата не се однесуваат на инвертори кои немаат можност за далечинска комуникација или работат во целосно изолирани системи.
Домашното производство не може брзо да ја надомести понудата
Иако мерката нема веднаш да влијае врз проектите што користат веќе сертифицирани модели, индустријата предупредува дека таа може да го забави развојот на новите соларни и батериски капацитети.
Според податоците на американското Министерство за енергетика, домашните производители во моментов обезбедуваат само околу 7% од пазарот на соларни инвертори, додека 93% од опремата доаѓа од странство.
Во такви услови, ограничувањата би можеле да предизвикаат недостиг од нови модели на инвертори токму во период кога инвеститорите планираат во следните 12 месеци да приклучат повеќе од 58 GW нови соларни и батериски капацитети.
Дополнителен предизвик претставува фактот што замената на веќе избраниот модел на инвертор со друг производител најчесто бара повторни технички анализи и нови процедури за приклучување на електроенергетската мрежа, што може значително да ги пролонгира роковите за реализација на проектите.
Производството во САД станува клучен услов
Новите правила се однесуваат на местото на финалното производство, а не на националноста на компанијата. Тоа значи дека ограничувањата ќе важат и за американски брендови доколку нивните инвертори се произведуваат во странство.
Истовремено, странски компании ќе можат да продолжат да добиваат одобренија доколку финалното производство го префрлат во САД и ги исполнат федералните критериуми за домашно производство.
Регулативата предвидува и можност за условно одобрување на поединечни модели преку Министерството за домашна безбедност (DHS) или Министерството за одбрана (DoD), доколку производителите докажат дека нивните производи не претставуваат ризик за националната безбедност и презентираат план за постепено преселување на производството во САД.
Одлуката е дел од пошироката стратегија на Вашингтон за зајакнување на безбедноста на критичната инфраструктура и намалување на зависноста од странска енергетска технологија, во време кога земјата забрзано инвестира во обновливи извори на енергија, батериски системи и електроенергетска инфраструктура за поддршка на растечката потрошувачка на електрична енергија, вклучително и од дата-центрите и развојот на вештачката интелигенција.
Извор: Pv-magazine.com
