Грција побара од Европската унија да ја преиспита обврската земјите-членки да ги наполнат складиштата за природен гас до најмалку 90% пред почетокот на зимската сезона, оценувајќи дека сегашните пазарни услови повеќе не ја оправдуваат оваа цел и дека таа може дополнително да придонесува за повисоки цени на енергенсите.
Прашањето го отвори заменик-министерот за животна средина и енергетика Никос Цафос на состанокот на Работната група на Европската комисија за подготвеност при енергетски кризи, иницирајќи дискусија дали сегашната регулатива треба да се ревидира.
Според платформата AGSI, европските складишта за природен гас во моментов се исполнети околу 55%, додека во истиот период минатата година нивото изнесуваше приближно 70%. Во неколку клучни пазари, како Холандија, Белгија и Германија, пополнетоста се движи меѓу 30% и 45%.
Во Атина предупредуваат дека исполнувањето на целта од 90% до 1 ноември може да бара масовни набавки на гас во услови на високи пазарни цени, што дополнително би го зголемило притисокот врз цените на електричната енергија во текот на зимата.
Грчката влада потсетува дека оваа мерка беше воведена во екот на енергетската криза во 2022 година, кога Европа настојуваше да ја намали зависноста од рускиот гас, но смета дека околностите денес значително се променети.
Од 2021 година наваму, потрошувачката на природен гас во Европската унија е намалена за околу 20%, благодарение на поголемото производство од обновливи извори, електрификацијата и послабата индустриска активност во дел од земјите-членки.
Според грчките власти, намалената побарувачка овозможува Европа безбедно да функционира и со пониско ниво на резерви, додека брзањето за исполнување на задолжителните квоти создава дополнителен притисок врз пазарот и ги одржува цените високи.
Во моментов, европскиот гас се тргува по околу 56-57 евра за мегават-час, откако неодамна достигна и 63 евра/MWh, значително над нивото пред енергетската криза.
Иако засега не е познато дали Европската комисија ќе предложи измени на правилата, грчката иницијатива претставува едно од првите отворени барања за ревизија на една од клучните мерки за енергетска безбедност што ЕУ ги воведе по кризата во 2022 година.
Извор: EnergyPress.eu
