Турција ќе распише 21 тендер за изградба на нови соларни и ветерни електрани со вкупен капацитет од 2.400 мегавати, во рамки на Програмата за обновливи енергетски подрачја (YEKA) за 2026 година, соопшти министерот за енергетика и природни ресурси Алпарслан Бајрактар.
Програмата предвидува 14 тендери за соларни електрани со вкупен капацитет од 900 мегавати и седум тендери за ветерни електрани со капацитет од 1.500 мегавати. Пријавувањето на заинтересираните инвеститори ќе започне на 13 октомври.
„Со тендерите YEKA за 2026 година ја отвораме вратата за нов инвестициски циклус во обновливите извори на енергија“, изјави Бајрактар.
Тој посочи дека сончевата и ветерната енергија имаат стратешка улога во новата енергетска архитектура, во која електричната енергија е во центарот на енергетската транзиција.
Според Бајрактар, инсталираниот капацитет за производство на електрична енергија во Турција надминал 125.000 мегавати, од кои 78.000 мегавати се од обновливи извори. Досега се реализирани тендери YEKA за вкупно 7.800 мегавати, од кои 3.800 мегавати биле доделени во текот на 2025 година.
Тој најави дека Турција ќе продолжи секоја година да распишува тендери за најмалку 2.000 мегавати нови соларни и ветерни капацитети.
„Со потенцијалот што го имаме во сончевата и ветерната енергија, ќе ја достигнеме целта од 120.000 мегавати инсталирани капацитети од овие извори до 2035 година за пократок период“, рече Бајрактар.
На тендерите ќе можат да учествуваат акционерски и друштва со ограничена одговорност регистрирани во Турција, заеднички вложувања и странски компании основани како капитални друштва.
Почетната максимална цена за сите тендери е утврдена на 5,50 евроценти за киловат-час, додека минималната цена изнесува 3,25 евроценти за соларните и 3,50 евроценти за ветерните електрани.
Производителите на електрична енергија од соларните централи ќе можат да ја продаваат струјата на слободниот пазар во период од 60 месеци по потпишувањето на договорот, а за ветерните електрани тој период ќе изнесува 72 месеци. По истекот на овие рокови ќе следува 20-годишен период на гарантиран откуп на произведената електрична енергија.
Извор: Hurriyetdailynews.com
