Светската продажба на електрични возила расте, Tesla Model Y останува најпродаван модел

Глобалниот пазар на електрични возила продолжува да расте, при што целосно електричните автомобили (BEV) сè повеќе ја преземаат водечката улога на сметка на plug-in хибридите (PHEV). Во мај 2026 година во светот се регистрирани околу 1,7 милиони plug-in возила, што е за 4% повеќе во споредба со истиот месец минатата година, покажува анализата на CleanTechnica.

Растот речиси целосно се должи на продажбата на целосно електрични автомобили, која пораснала за 15%, додека продажбата на plug-in хибриди се намалила за 15%. Тоа е првпат од 2019 година хибридните модели да бележат пад пет последователни месеци, што според анализата укажува дека забавувањето на овој сегмент не е само привремено, туку претставува подолгорочен тренд.

Во мај, 71% од сите продадени plug-in возила биле целосно електрични, односно околу 1,2 милиони автомобили, додека во првите пет месеци од годинава нивниот удел достигнал 70%. Вкупниот удел на plug-in возилата на светскиот автомобилски пазар сега изнесува 22%, од кои 16% се целосно електрични, а 6% се plug-in хибриди.

Иако намалувањето на субвенциите во Кина и укинувањето на американските поттикнувања за купување електрични возила негативно влијаеја врз двата најголеми пазари, остатокот од светот бележи значително побрз раст. Ако се исклучат Кина и САД, глобалната продажба на електрични возила во мај е зголемена за 39%, а кај целосно електричните модели растот достигнал 47%, што покажува дека електрификацијата забрзува на многу други пазари.

Најпродаван модел во светот и натаму е Tesla Model Y, со 93.571 испорачани возила во мај, што е раст од 16% на годишно ниво. Следуваат Geely Xingyuan со околу 47.000 регистрации и Tesla Model 3 со 44.237 продадени автомобили. Во првите пет се наоѓаат и BYD Song, кој добива нов импулс по лансирањето на новата генерација, како и BYD Yuan Up (Atto 2), чија продажба е поттикната од освежениот модел и новата plug-in хибридна верзија.

Меѓу најголемите изненадувања е кинескиот Leapmotor A10, кој со околу 22.000 продадени возила уште во третиот месец од продажбата се искачи на осмото место. Добри резултати бележат и новата генерација на MG4, AITO M6, Wuling Mini EV, BYD Sealion 05, Xpeng Mona M03 и Wuling Bingo, што покажува дека кинеските производители продолжуваат агресивно да го прошируваат своето присуство на глобалниот пазар.

Во периодот јануари–мај, Tesla Model Y останува убедливо најпродаван електричен автомобил во светот, со речиси двојно поголема продажба од второпласираниот Geely Xingyuan. Tesla Model 3 е трет, но аналитичарите очекуваат до крајот на годината да се соочи со силен притисок од новата генерација на BYD Song. Во првите десет најпродавани модели се наоѓаат дури пет модели на BYD, што дополнително ја потврдува доминацијата на кинескиот производител.

Кај производителите, BYD останува убедливо најголем светски производител на plug-in возила со 19% удел на пазарот. Следуваат Geely со 10,1% и Tesla со 8,1%, додека најголем напредок бележи Leapmotor, кој се искачи на четвртото место, престигнувајќи ги BMW и Volkswagen. Добри резултати имаат и Zeekr, SAIC, Hyundai-Kia и Xiaomi, кој со само две години присуство на автомобилскиот пазар веќе продава повеќе електрични возила од Mercedes-Benz.

Според анализата, досега во 2026 година во светот се продадени околу 5,2 милиони целосно електрични возила, што претставува 70% од сите plug-in регистрации, а доколку сегашниот тренд продолжи, нивниот удел до крајот на годината би можел да надмине 75%, што би било највисоко ниво во последната деценија.

Топ 10 најпродавани електрични модели (јануари–мај 2026)

Извор: CleanTechnica.com