Приватниот капитал ќе игра сè поважна улога во финансирањето на глобалната експанзија на вештачката интелигенција (AI), бидејќи најголемите технолошки компании планираат да инвестираат дури 5,3 трилиони долари во дата-центри и поврзана инфраструктура до 2030 година, покажува најновата анализа на Голдман Сакс.
Според извештајот на инвестициската банка, обемот на потребните инвестиции веќе ги надминува традиционалните извори на корпоративно задолжување, што го зголемува значењето на приватните инфраструктурни и недвижносни фондови како клучни финансиери на новиот технолошки циклус.
Главниот кредитен стратег во истражувачкиот оддел на Голдман Сакс, Аманда Линам, оценува дека категориите на приватна инфраструктура и недвижности ќе имаат уште поголема улога во наредните години, особено поради растечките потреби за изградба на дата-центри кои ја поддржуваат револуцијата на вештачката интелигенција.
Во 2025 година приватните инфраструктурни фондови собрале рекордни 221 милијарда долари нов капитал, додека просечната големина на фондовите достигнала 1,8 милијарди долари. Истовремено, тие оствариле принос од 12,8 проценти, што ги прави една од најуспешните категории на приватни инвестиции.
Аналитичарите на Голдман Сакс проценуваат дека пазарот на приватна инфраструктура може да ја забрза својата експанзија и до крајот на деценијата да надмине 3 трилиони долари средства под управување. Во моментов инфраструктурните фондови располагаат со повеќе од 1,7 трилиони долари активи, од кои околу 400 милијарди долари се подготвени за инвестирање.
Паралелно со тоа, приватниот сектор за недвижности управува со дополнителни 2,1 трилиони долари активи, вклучувајќи околу 600 милијарди долари неискористен капитал. Заедно, двата сегмента располагаат со речиси 3,8 трилиони долари средства, што претставува значителен извор за финансирање на идните проекти поврзани со вештачката интелигенција.
Извештајот предупредува дека т.н. „хиперскејлери“, најголемите технолошки компании кои ја предводат изградбата на AI инфраструктурата, веќе претставуваат значителен дел од новото корпоративно задолжување на финансиските пазари. Поради тоа, тие би можеле да се соочат со ограничувања поврзани со заситеност на пазарите на обврзници и концентрација на ризик кај инвеститорите.
Токму затоа приватните пазари стануваат сè поважен извор на капитал. Финансирањето на дата-центрите опфаќа широк спектар на инвестиции, од земјиште и објекти, до енергетска инфраструктура, мрежна опрема и технолошки системи, што ги поврзува инфраструктурните и недвижносните фондови во заедничка инвестициска екосфера.
Дополнителен поттик за растот на инфраструктурните фондови доаѓа и од инвестициите во енергетска безбедност и модернизација на енергетските мрежи. Институционалните инвеститори ги сметаат овие фондови за привлечни поради стабилните приходи, диверзификацијата на портфолијата и заштитата од инфлација.
Според Голдман Сакс, иако изградбата на дата-центри значително се забрзува, растот на планираните капитални инвестиции на технолошките гиганти и натаму е многу побрз од реалната изградба на нови капацитети. Поради тоа, потребите за долгорочно финансирање на AI инфраструктурата ќе продолжат да растат во следните години, отворајќи простор приватниот капитал да стане еден од главните двигатели на дигиталната трансформација.
Извор: GoldmanSachs.com
