Кина бележи забрзан раст на нуклеарната енергија, при што капацитетот на нуклеарните електрани во земјата речиси е удвоен во последната деценија, покажуваат најновите податоци на Американската администрација за енергетски информации (EIA) и Меѓународната агенција за атомска енергија (IAEA).
Од 2016 до 2024 година, кинескиот нуклеарен капацитет е зголемен за 76%, односно за 24 гигавати. Според податоците на IAEA, Кина додала уште 1,1 гигават нов капацитет во 2025 година и дополнителни 2,2 гигавати во првите пет месеци од 2026 година.
Заклучно со мај 2026 година, Кина располага со 60 оперативни нуклеарни реактори со вкупен инсталиран капацитет од 58,7 гигавати, распоредени на 18 различни локации. Најголемиот дел од нуклеарните постројки се наоѓаат долж источниот брег на земјата, од провинцијата Лиаонинг на север до Хаинан на југ.
Кина во моментов има 36 реактори во изградба на 19 локации, што претставува речиси половина од вкупната глобална нуклеарна изградба. Со нивното завршување ќе бидат додадени околу 38,9 гигавати нов капацитет.
Кинеските власти применуваат стандардиран пристап за проектирање, лиценцирање и изградба на реактори, со цел побрза и поевтина реализација на проектите. Реакторите се градат во серии од шест до десет единици за да се искористат економиите од обем, а земјата паралелно развива домашен синџир за снабдување со нуклеарна опрема за да ја намали зависноста од странски компании.
Според Светскиот извештај за состојбата на нуклеарната индустрија, просечното време за изградба на нуклеарна електрана во Кина меѓу 2012 и 2021 година изнесувало околу шест години, што е значително помалку од светскиот просек од девет години.
Само во 2025 година Кина започнала изградба на шест нови реактори, а во 2026 година уште два – Xuwei-1 и Taipingling-4. Во меѓувреме, во работа веќе се пуштени новите единици Sanao-1 и Taipingling-1.
Кина истовремено го развива и својот прв мал модуларен реактор (SMR) – Linglong-1, домашно дизајниран реактор со капацитет од 100 мегавати. Проектот е наменет за производство на електрична енергија, десалинизација на вода и централно греење, а се очекува да започне со работа во првата половина на 2026 година.
Linglong-1 користи модуларен ACP100 дизајн, кој овозможува делови од реакторот да се произведуваат фабрички и потоа да се монтираат на самата локација, со што дополнително се скратува времето за изградба.
Извор: EIA.gov
