Шведската компанија Volvo Group од 2026 година ќе почне да прима нарачки за новиот далекусежен батериски камион Volvo FH Aero Electric. Возилото, според производителот, може да помине до 600 километри со едно полнење, а батеријата се полни за околу 40 минути.
Овој развој е дел од глобалната стратегија за преобликување на енергетската потрошувачка со цел намалување на штетните емисии и справување со климатските промени. Експертите нагласуваат дека електрификацијата на транспортот, греењето и индустријата е клучна за енергетската транзиција, бидејќи овозможува поефикасен систем и избегнување на загубите што ги создава согорувањето на фосилни горива.
„Чистата електрификација е ’рбетот на енергетската транзиција и ќе ја носи најголемата тежина“, вели Елена Праветони од тинк-тенкот Energy Transitions Commission.
Истражувањата на Меѓународната агенција за енергија (IEA) покажуваат дека електричните автомобили трошат два до четири пати помалку енергија од возилата на фосилни горива, додека топлинските пумпи произведуваат повеќе енергија за греење отколку што трошат електрична енергија. Моделите на IEA предвидуваат дека, до 2035 година, финалната глобална потрошувачка на енергија би можела да се намали за 15 отсто, и покрај растот на глобалната економија.
Сепак, патот до целосна електрификација е исполнет со предизвици: од огромни инвестиции во инфраструктура, преку убедување на домаќинствата да усвојат нови технологии, до справување со нестабилноста на обновливите извори.
Иако Европа бележи напредок со продажбата на електрични автомобили, стапката на електрификација стагнира околу 22% уште од 2007 година. Продажбата на топлински пумпи, пак, падна за 22% во 2024 година поради пониски цени на гасот и повлекување на државните субвенции.
Кина, напротив, бележи значителен раст – електричната енергија веќе сочинува 30 отсто од финалната потрошувачка, а продажбата на електрични автомобили во 2025 година се очекува да достигне 12,5 милиони возила. Земјата инвестира и до 800 милијарди долари во модернизација на електромрежата.
Според експертите, придобивките од електрификацијата, како намалување на емисиите, подобар квалитет на воздухот и поефикасно користење на енергијата, носат оптимизам дека транзицијата кон одржлив енергетски систем е достижна, иако предизвиците остануваат големи.
Извор: Financial Times
