Белград. 3 октомври 2025 – Унгарската државна електроенергетска компанија MVM го зголеми својот удел во српските компании „Енерготехника Јужна Бачка“ и „Електромонтажа Кралево“ од 33,4 на 60 отсто, објави порталот eKapija. Со тоа MVM стана мнозински сопственик на двете фирми кои претходно беа во рамки на „Манекс група“, контролирана од бизнисменот Драгољуб Збилјиќ.
Во соопштението на MVM се наведува дека по добивањето на сите неопходни одобренија од надлежните органи за заштита на конкуренцијата, трансакцијата била успешно завршена на 30 септември.
Компанијата истакнува дека зајакнувањето на позицијата на српскиот енергетски пазар е еден од нејзините клучни стратешки приоритети во регионот. Географската положба на Србија, заедно со поволните пазарни услови и тековните приватизации, ја прават земјата важна влезна точка за понатамошна експанзија на MVM кон останатите држави на Балканот.
„Енерготехника Јужна Бачка“ и „Електромонтажа Кралево“ се меѓу водечките енергетски градежни компании во Србија со повеќедецениско искуство и респектабилни референци. MVM потсетува дека првично стекнала малцински удел во овие компании во 2022 година, по што тие забележале значителен раст на приходите и профитабилноста.
Извор: eKapija.com
