Испораките на руски гас кон Европа преку гасоводот „Турски тек“ останаа на високо и стабилно ниво и во јануари 2026 година, достигнувајќи вкупно 1,61 милијарди кубни метри.
Според податоците на ENTSOG, обработени, просечните дневни испораки на влезната точка „Странџа 2“ на турско-бугарската граница изнесувале околу 52 милиони кубни метри, што е на ниво на рекордните испораки забележани во декември 2025 година.
Гасоводот „Турски тек“, со годишен капацитет од 15,75 милијарди кубни метри за европската делница, останува единствениот активен гасовод за руски гас кон Европа откако Украина го прекина транзитот на почетокот на 2025 година, по истекот на петгодишниот договор со Москва на крајот на 2024 година. Во текот на 2025 година, вкупните испораки преку овој гасовод достигнале 16,8 милијарди кубни метри, надминувајќи го номиналниот капацитет, и биле за околу 8% повисоки од нивото во 2024 година.
Најголеми купувачи на руски гас преку „Турски тек“ се Унгарија, Словачка и Србија, кои одржуваат релативно блиски односи со Москва. Гасот може да се испорачува и до Романија, Грција, Македонија и Босна и Херцеговина. Бугарија и Србија имаат клучна улога како транзитни земји за испораките кон Унгарија и Словачка.
Словачка, која остана без руски гас во јануари 2025 година по прекинот на украинскиот транзит, започна со увоз преку „Турски тек“ во февруари истата година. Унгарија, пак, има 15-годишен договор со „Гаспром“ од септември 2021 година за 4,5 милијарди кубни метри годишно, а увезува и дополнителни количини. Унгарскиот министер за надворешни работи Петер Сијарто изјави кон крајот на ноември дека земјата веќе примила повеќе од 7 милијарди кубни метри руски гас во 2025 година.
Србија продолжува да увезува руски гас преку серија краткорочни продолжувања на договорот со „Гаспром“. Претседателот Александар Вучиќ на 23 декември соопшти дека е потпишан нов договор со важност до крајот на март 2026 година. Постојниот аранжман предвидува испорака од 2,2 милијарди кубни метри годишно по цени целосно индексирани на нафтата, што на Србија ѝ овозможува пониски трошоци во споредба со цените поврзани со европските гасни хабови.
Во меѓувреме, референтната цена на холандскиот гасен хаб TTF за испорака наредниот месец, според проценката на Platts, на 30 јануари изнесувала 40,69 евра за мегават-час.
Извор: SPglobal.com
