Киев. 27 мај 2025 – Украина направи клучен чекор кон поедноставување на увозот на природен гас преку Трансбалканскиот гасоводен коридор, откако Националната комисија за државна регулација на енергетиката и комуналните услуги (НКРЕКП) одобри нов механизам за заеднички транспорт на гас.
Со новите правила, украинскиот оператор на гасниот преносен систем доби можност да понуди заеднички производ за транспорт на гас заедно со операторите од Грција (DESFA SA), Бугарија (Bulgartransgaz), Романија (Transgaz SA), и Молдавија (VestMoldTransgaz SRL). Ова значи дека капацитетите на сите точки долж Трансбалканската рута ќе се доделуваат преку единствена аукција, овозможувајќи транспортирање на гас од Грција до Украина со обем од околу 3 милиони кубни метри дневно.
Регулаторот смета дека овој чекор ќе ја зголеми атрактивноста на украинскиот гасен пазар и ќе ги прошири можностите за диверзификација на изворите на снабдување. Тоа е особено важно во услови на тековната воена агресија од Русија. 
Министерството за енергетика на Украина посочува дека Трансбалканскиот коридор има значаен потенцијал за задоволување на украинските потреби за гас, нудејќи пристап до течен природен гас (LNG). Сепак, поради транзитот низ пет земји и примената на регулативни тарифи, оваа рута досега беше финансиски неисплатлива.
Соработката меѓу операторите доведе до развој на оптимизирано решение, кое овозможува користење на неискористените капацитети на гасоводот по конкурентни тарифи – што е особено значајно во подготовките за претстојната грејна сезона.
Трансбалканскиот гасовод, кој со децении се користеше за транспорт на руски гас кон Балканот, сега добива нова улога во енергетската инфраструктура на Источна Европа. Да потсетиме, на крајот на 2024 година, Украина за првпат увезе LNG од американската компанија Venture Global преку грчкиот терминал Ревитуса. Тогаш, во земјата пристигна пратка од околу 100 милиони кубни метри гас, транспортирана со танкерот Gaslog Savannah.
Извор: Mezha.net
